नांदेड - महापालिकेने ता. ३१ डिसेंबरपर्यंत मालमत्ता कराची ३२ कोटी ९५ लाख ८८ हजार रुपयांची वसुली केली आहे. शास्तीमाफीचा अनेकांनी फायदा घेतला असून डिसेंबर महिन्यात १३ कोटी १५ लाखांची वसुली झाली आहे. ता. ३१ मार्चअखेर ६० कोटी करवसुलीचे उद्दिष्ट ठेवण्यात आले आहे.

पालिकेच्या स्थायी समितीचे सभापती अमित तेहरा यांच्या प्रमुख उपस्थितीत मंगळवारी (ता. सात) स्थायी समिती सभागृहात मालमत्ता कर वसुलीच्या संदर्भात आढावा बैठक घेण्यात आली. या वेळी सभागृह नेते विरेंद्रसिंग गाडीवाले, उपायुक्त अजितपालसिंघ संधू, क्षेत्रीय अधिकारी राजेश चव्हाण, प्रकाश गच्चे, रावण सोनसळे, डॉ. रईसोउद्दिन, संभाजी कास्टेवाड, कार्यालय अधीक्षक दत्तात्रय पाटील यांच्यासह वसुली लिपिक, पर्यवेक्षक व सदस्य उपस्थित होते.

हेही वाचा....अखेर नांदेडला मिळाला विरोधी पक्षनेता

अधिकारी, कर्मचाऱ्यांचे कौतुक
या वेळी मालमत्ता कर वसुलीचा आढावा घेऊन सभापती तेहरा व गाडीवाले यांनी सर्वात जास्त करवसुली करणाऱ्या अधिकारी व कर्मचाऱ्यांचे कौतुक केले. वजिराबाद क्षेत्रीय कार्यालयाने सर्वात जास्त पाच कोटी ६१ लाख रुपये कर वसुली केली. येत्या तीन महिन्यांत मार्चअखेरपर्यंत दिलेले करवसुलीचे उद्दिष्ट पूर्ण करावे, असेही या वेळी सांगण्यात आले. 

मागील वर्षापेक्षा जास्त वसुली
मालमत्ता कराची एकूण १८५ कोटी रुपयांची वसुली करण्याचे उद्दिष्ट आहे. त्यात २०१९ - २० चालू वर्षाची मागणी ५८ कोटी होती. त्याचबरोबर थकबाकीची शास्ती ५६ कोटी, तर अनधिकृत बांधकामावरील शास्ती २० कोटी रुपये होती. आता ता. ३१ डिसेंबरपर्यंत ३२ कोटी ९५ लाख ८८ हजार ४६४ रुपयांची वसुली झाली आहे. गेल्या वर्षीपेक्षा यंदा डिसेंबरपर्यंतच जास्त कर वसुली आहे. त्याचबरोबर गेल्या वर्षी २०१८-१९ मध्ये ४८ कोटी रुपयांची, तर २०१७-१८ या वर्षामध्ये ४२ कोटी रुपयांची करवसुली झाली होती. 

हेही वाचा...‘ही’ जिल्हा परिषदेची शाळा तालुक्यात अव्वल

करवसुलीसाठी पथकांची स्थापना 
महापालिका हद्दीत एकूण एक लाख १६ हजार मालमत्ता असून आतापर्यंत जवळपास ३३ कोटींची करवसुली झाली आहे. आता ता. ३१ मार्चअखेर ६० कोटी रुपयांचे उद्दिष्ट ठेवण्यात आले आहे. या संदर्भात मालमत्ताधारकांना वसुली लिपिकांमार्फत मागणी नोटिसा देण्यात आल्या आहेत. आत्तापर्यंत सवलती देण्यात आल्या होत्या त्याचा लाभही अनेकांनी घेतला आहे. आता करवसुलीसाठी क्षेत्रीय कार्यालयनिहाय पथकांची स्थापना करण्यात आली आहे. 
- अजितपालसिंघ संधू, उपायुक्त.