नांदेड -  नांदेडला एक महिन्यात लॉकडाउन काळात कोरोनाचा एकही पॉझिटिव्ह रुग्ण आढळला नसल्यामुळे ता. २२ मार्च ते ता. २१ एप्रिलपर्यंतची परिस्थिती दिलासादायक होती. पण बुधवारी (ता. २२) नांदेड शहरामध्ये पहिला रुग्ण पॉझिटिव्ह आढळून आला आहे. त्यामुळे आता नांदेडकरांना आणखी दक्ष रहावे लागणार आहे. जनतेने घाबरुन न जाता घरातच राहून सहकार्य करावे, असे आवाहन जिल्हा प्रशासनाच्या वतीने करण्यात आले आहे.

कोरोनाबाबत प्रतिबंधात्मक उपाययोजना करुन आत्तापर्यंत तब्बल महिनाभर कोरोनाला नांदेड जिल्ह्याच्या सीमेवर थोपवून धरण्यात जिल्हा प्रशासनाने यश मिळवले होते. मात्र, महिनाभरानंतर बुधवारी (ता. २२) एक रुग्ण पॉझिटिव्ह आढळला आहे. तरी देखील जनतेने घाबरुन न जाता घरातच राहून सहकार्य करावे, असे आवाहन जिल्हा प्रशासनाच्या वतीने करण्यात आले आहे.

हेही वाचा - धक्कादायक : नांदेडमध्ये कोरोना बाधीत पहिला रुग्ण

कोरोना विरुद्ध जगभरात लढाई सुरु आहे. भारतात आणि महाराष्ट्रातही ता. तीन मे पर्यंत लॉकडाउन आहे. नांदेडला देखील गेल्या महिन्याभरापासून जिल्हा प्रशासन, पोलिस प्रशासन, महापालिका त्याचबरोबर पालकमंत्री, खासदारांसह इतर लोकप्रतिनिधी या सर्वांनी सामुहिक प्रयत्न केले. त्यामुळे महिनाभरात एकही पॉझिटिव्ह रुग्ण आढळून आला नाही. अखेर महिनाभरानंतर बुधवारी (ता. २२) एक रुग्ण पॉझिटिव्ह आढळून आला आहे. 

जनतेने घरातच राहून सहकार्य करावे
नांदेड शहरातील पिरबुऱ्हाननगर भागात ६४ वर्षीय कोरोनाचा संशयित रुग्ण पॉझिटिव्ह आढळून आला आहे. जनतेने घाबरुन न जाता घरातच राहून सहकार्य करावे, असे आवाहन जिल्हा प्रशासनाच्या वतीने करण्यात आले आहे. दरम्यान, पिरबुऱ्हाणनगर व आजूबाजूचा पाच किलोमीटरचा परिसर पूर्णतः सील करण्यात आला आहे. हा रुग्ण सोमवारी (ता. २०) दुपारी शासकीय महाविद्यालयात ताप, खोकला व दम लागण्याच्या तक्रारीमुळे दाखल झाला होता. या रुग्णावर उपचार सुरु असून पिरबुऱ्हाणनगर व आसपासचा पाच किलोमीटरचा परिसर पूर्णतः सील करण्यात आला आहे.

हेही वाचलेच पाहिजे - पीरबुऱ्हाणचा पाच किलोमीटर परिसर सील

महत्वाच्या उपाययोजना करण्यासंदर्भात निर्णय
दरम्यान, जिल्हाधिकारी डॉ. विपीन, महापालिकेचे आयुक्त डॉ. सुनिल लहाने, पोलिस अधीक्षक विजयकुमार मगर, जिल्हा शल्य चिकित्सक डॉ. निळकंठ भोसीकर, महापालिकेचे प्रभारी वैद्यकीय अधिकारी डॉ. सुरेशसिंह बिसेन यांच्यासह प्रमुख अधिकाऱ्यांची बैठक झाली आणि पुढील उपाययोजना करण्यासंदर्भात निर्णय घेण्यात आले. जिल्हा प्रशासनाच्यावतीने या सील करण्यात आलेल्या भागातील जनतेने घरातच राहण्याचे निर्देश देण्यात आले आहेत. या सील केलेल्या भागात तसेच रुग्णाच्या संपर्कात आलेल्या संभावित संशयीतांच्या तपासणीसाठी वैद्यकीय पथके आणि पोलिस तैनात करण्यात आली असून त्यांनी कामाला सुरुवात केली आहे. 

रस्त्यावरील वर्दळ झाली कमी 
दरम्यान, आत्तापर्यंतच्या झालेल्या कार्यवाहीची माहिती पालकमंत्री अशोक चव्हाण तसेच खासदार प्रताप पाटील चिखलीकर, आमदार बालाजी कल्याणकर यांच्यासह लोकप्रतिनिधींनी घेतली आहे. सध्या पिरबुऱ्हाणनगर आणि आजूबाजूचा परिसर सील करण्यात आला असून पोलिस बंदोबस्तातही वाढ करण्यात आली आहे. त्याचबरोबर कोरोनाचा पॉझिटिव्ह रुग्ण आढळून आल्यानंतर शहरातील रस्त्यावरील गर्दीही काल, परवाच्या तुलनेत बुधवारी (ता. २२) अत्यंत कमी झाल्याचे दिसून आले. अनेक रस्त्यांवर दुपारच्या वेळी शुकशुकाट दिसून येत होता.