घनसावंगी (जि.जालना) - कोरोना विषाणूच्या संसर्गामुळे उद्भवलेल्या परिस्थतीत तीन महिने दुकाने बंद होती. त्यामुळे अनेक व्यापारी, व्यावसायिक अडचणीत आले. ही बाब लक्षात घेत येथील तब्बल ७५ दुकानदारांचे एक महिन्याचे भाडे माफ करण्याचा निर्णय दादासाहेब संकुलाचे मालक विक्रम देशमुख यांनी घेतला. त्यामुळे दुकानदार, व्यापाऱ्यांना मोठा दिलासा मिळाला आहे. 

कोरोना विषाणूच्या संसर्गामुळे उद्भवलेल्या परिस्थतीत देशात व राज्यात लॉकडाउन व संचारबंदी लागू करण्यात आली. त्यामुळे घनसावंगी शहरासह ग्रामीण भागातील सर्व व्यापाऱ्यांना दुकाने बंद ठेवावी लागली होती. त्यात अनेक व्यापाऱ्यांचा व्यवसाय हातावर असणाऱ्या व्यापाऱ्यांची आर्थिक परिस्थिती कोलमडली.

हेही वाचा : आठवणींना जोडणारा लोखंडी पूल

घनसावंगी येथे बसस्थानक परिसरातील दादासाहेब व्यापारी संकुलात मोबाईल दुरुस्ती, लॉँड्री, दूध विक्रेता, सलूनसह ७५ दुकानदार, व्यापारी आहेत. या साऱ्यांना लॉकडाउनचा मोठा फटका बसला. अनेकजण आर्थिक अडचणीत सापडले. ही बाब लक्षात घेत संकुलातील व्यापारी, दुकानदारांचे एक महिन्याचे भाडे माफ करण्याचा निर्णय विक्रम नंदकुमार देशमुख यांनी घेतला. जवळपास दोन ते अडीच लाख रुपयांचे नुकसान सहन करीत त्यांनी व्यापारी, दुकानदारांनी दिलासा दिला हे विशेष.

हेही वाचा : पीककर्जावर शेतकऱ्यांची मदार

यानिमित्त श्री. देशमुख यांचा व्यापाऱ्यांच्या वतीने सत्कार करण्यात आला. यावेळी श्याम भोसले, प्रवीण जोगड, श्री. कोरडे, समाधान चांदर, अंकुश पवार, शेख अफसर, श्री. सय्यद यांच्यासह अनेकांची उपस्थिती होती. 

माझ्या आजोबांनी या भागातील पोलिस ठाणे, पूर्वीची जिल्हा परिषद शाळा यासह इतर शाळांना जागा दिली आहे. तीच परंपरा कायम ठेवत वडील नंदकुमार देशमुख यांनी जिल्हा परिषदेच्या शाळेला करोडो रुपयांची दोन एकर जागा दान दिली. आमची  ही वडिलोपार्जित परंपरा कायम ठेवत आहोत. संकुलातील व्यापाऱ्यांचे आणि आमचे नाते आपुलकीचे आहे. त्यांना या संकटात धीर देणे आमचे काम आहे. आपण  त्यांच्यासाठी काही तरी करू, या उद्देशाने एक महिन्याचा किराया माफ करण्याचा निर्णय घेतला. 
- विक्रम देशमुख, जागामालक