अणदूर (जि. उस्मानाबाद) : स्वतःचेच जगणे संघर्षमय अन्‌ शासन मदतीवर अवलंबून असलेल्या दिव्यांग किशोर मुळे यांनी लाखमोलाची मदत करीत माणुसकी जपली आहे. त्यांनी आपले एक महिन्याचे मानधन निराधारांसाठी चालविण्यात येत असलेल्या घरपोच जेवण अभियानाला दिले आहे. मदत छोटी असली तरी त्यामागील भावना मोठी असल्याचा प्रत्यय आला आहे.

संपूर्ण देशात गेल्या जवळपास २१ दिवसांपासून अत्यावश्यक सेवा वगळता संचारबंदी आहे. त्यामुळे ग्रामीण भागातील ज्येष्ठ नागरिक, निराधार, मतिमंद, दिव्यांगांचे जगणे असह्य झाले आहे. अशा गरजूंचा शोध घेऊन त्यांना दोनवेळा जेवण पुरवठा करण्यात येत आहे. यासाठी केशव वाचनालय व साहेबराव घुगे मित्रमंडळाने पुढाकार घेतला आहे.

हेही वाचा -  औरंगाबादेत सतरा वर्षीय मुलगा पॉझिटीव्ह, संख्या पंचवीसवर 

मागील पंधरा दिवसांपासून सुरू असलेल्या या अन्नदान योजनेत डोळ्याने अधू असलेल्या किशोर मुळे यांनी अपंग योजनेतून त्यांना शासनाकडून दरमहा मिळणारे एक हजार रुपये या अभियानाला देऊन मदत करीत माणुसकी जपली आहे. स्वतःच्याच जीवनात जगण्याचा संघर्ष सुरू असताना त्यांनी केलेली ही मदत गरजूंना जगण्यासाठी लाखमोलाची ठरली आहे. त्यांचे दातृत्व छोटे असले, तरी त्यामागची भावना मोठी असल्याचा प्रत्यय अणदूरवासीयांना दिला आहे.

मराठवाड्याच्या इतर बातम्या वाचण्यासाठी - क्लिक करा

 आडवाटेने प्रवास करणारे 
२० ऊसतोड मजूर ताब्यात 
उस्मानाबाद : कोरोना विषाणूच्या प्रसारास प्रतिबंध व्हावा, गर्दी टाळावी या उद्देशाने संचारबंदी असतानाही ट्रॅक्टर ट्रॅालीमधून आडवाटेने प्रवास करीत जाणाऱ्या २० ऊसतोड मजुरांना येरमाळा (ता. कळंब) पोलिसांनी ताब्यात घेऊन त्यांची रवानगी जिल्हा परिषदेच्या शाळेत केली. 

पोलिसांनी दिलेल्या माहितीनुसार नागपूर येथून पिंपळवाडी (ता. बार्शी) येथे निघालेले ट्रॅक्टर-ट्रॉलीमधून आडवाटेने प्रवास करणाऱ्या २० ऊसतोड कामगारांना सोमवारी (ता. १३) दुपारी अडीचच्या सुमारास पोलिसांनी ताब्यात घेतले. या सर्वांना येरमाळा येथील बांगरवाडी फाट्याजवळून ताब्यात घेण्यात आले. त्यांची रवानगी जिल्हा परिषदेच्या शाळेत महसूल प्रशासनाने उभारलेल्या तात्पुरत्या निवारागृहात करण्यात आली आहे. त्यांची वैद्यकीय तपासणी आरोग्य विभागाच्या कर्मचाऱ्यांनी केली.

याप्रकरणी ट्रॅक्टरचालक व मालक गणेश पांडुरंग डुकरे (रा. घारी, ता. बार्शी), नितीन सोमनाथ जाधव, रामहरी श्रीमंत जाधव (दोघेही रा. पिंपळवाडी, ता. बार्शी) यांच्याविरुद्ध गुन्हा नोंद करण्यात आला आहे.