उस्मानाबाद : परजिल्ह्यातून आलेल्या नागरिकांना क्वारंटाईन केले जात आहे; मात्र अनेक गावांत परजिल्ह्यातून येणाऱ्यांना गावात प्रवेश दिला जात नाही. अनेक गावकऱ्यांकडून परगावातून येणाऱ्यांना शेतात राहण्याचा सल्ला दिला जात आहे. अनेक जण स्वत:हून गावात येण्यापूर्वी शेतात पत्र्याची शेड मारून राहणे पसंत करीत आहेत. त्यामुळे पत्रे आणि लोखंडी अँगलची मागणी बाजारात मोठ्या प्रमाणात वाढली आहे. तर दरही प्रतिकिलो १० ते १५ रुपयांनी वाढल्याने गरजूंच्या खिशाला कात्री लागत आहे.

पुणे, मुंबई, औरंगाबाद अशा महानगरातून अनेक नागरिक, कामगार आपल्या मूळगावी परतत आहेत. जिल्ह्यात गेल्या २५ दिवसांत तब्बल ५० हजार नागरिक ग्रामीण भागात आले आहेत. अशा नागरिकांना शाळेत क्वारंटाईन केले जात आहे. असं असलं तरी अनेक नागरिक स्वतःच्या शेतातच पत्र्याचे शेड मारून राहण्याचा प्रयत्न करत आहेत. त्यामुळे सध्या पत्रे आणि लोखंडी अँगल यांचे मागणी चांगलीच वाढली आहे.

हे वाचंलत का? - आता पाच मिनिटांत कोरोनाचे निदान; राज्यातील पहिलाच प्रयोग

गावातील नागरिक आणि पुणे, मुंबई अशा ठिकाणातून येणारे नागरिक यांच्यातील संघर्ष वाढत असल्याने बाहेरगावचे नागरिक शेताला अधिक पसंती देत आहेत. दहा ते पंधरा दिवसांवर पावसाळा येऊन ठेपला आहे. अशा परिस्थितीत पत्र्याचे शेड मारले तर अधिक फायदा होईल, त्यासाठी अनेक नागरिक शेतात राहण्यास प्राधान्य देत आहेत.

ग्रामीण भागात याचे प्रस्थ मोठे वाढले आहे. त्यामुळे बाजारातील पत्रे आणि लोखंडी अँगल मोठ्या प्रमाणात उलाढाल होत आहे. शेतात राहिल्याने गावाशी काही संबंध येत नाही. शिवाय सोशल डिस्टन्सचा प्रश्न उद्भवत नसल्याने नागरिक शेतात राहण्यास प्राधान्य देत आहे. विशेष म्हणजे यंदा पाऊस चांगला झाल्याने शेतावरतीही पुरेसे पाणी उपलब्ध होत असल्याने अशा नागरिकांना ही एक जमेची बाब ठरली आहे. 

क्लिक करा- घाबरू नका, तब्बल नव्वद टक्के रुग्ण ठणठणीत बरे होणार

कोरोना संकट येण्यापूर्वी चांगल्या दर्जाचा पत्रा ५० ते ५५ रुपये किलोप्रमाणे ग्राहकाला मिळत होता. आज तो ६० ते ६५ रुपये किलोप्रमाणे गेला आहे. लोखंडी अँगल ४० ते ४५ रुपये प्रति किलोपर्यंत मिळत होते. आज तेच पन्नास-पंचावन्न रुपयांच्या पुढे गेले असून, मागणीही वाढली आहे. दररोज दोन तीन लोक प्रत्येक गावात अशाप्रकारे खरेदीसाठी येत आहेत. असा माल बाजारात येण्यास वेळ लागत असल्याने मागणी चांगली वाढली आहे. 
- अमोल धाबेकर, व्यावसायिक.