परभणी : मराठवाड्यात पुढील पाच दिवसात ढगाळ वातावरण राहुन ता.१० व ११ मार्च रोजी हलक्या स्वरुपाचा पाऊस पडण्याची शक्यता वसंतराव नाईक मराठवाडा कृषी विद्यापीठाने वर्तवली आहे. त्यामुळे शेतकऱ्यांनी सावध राहत काढणीस आलेली पीके सुरक्षीत राहण्याकडे भर द्यावा, असा सल्ला विद्यापीठाने दिला आहे.

सध्या काही जिल्ह्यात ढगाळ वातावरण निर्माण झाले आहे. मागील आठवड्यातदेखील काही भागात पावसाने हजेरी लावली होती. त्यामुळे रब्बी पिके धोक्यात आली आहेत. गत डिसेंबर आणि यंदाच्या जानेवारी महिण्यात ढगाळ वातावरणामुळे हरबरा, गहु या पिकांना चांगलाच फटका बसलेला आहे. गतवर्षीच्या ऑक्टोबर महिन्यापासून सातत्याने ढगाळ वातावरण निर्माण होत आहे. 

हेही वाचा -फौजदार ‘रुपाली’ यांचा साहसी प्रवास

सातत्याने पावसाळी वातावरण  
संपूर्ण हिवाळादेखील अशाच वातावरणात राहीला होता. आता उन्हाळा सुरु झाला तरी, देखील पावसाळी वातावरण सातत्याने निर्माण होत आहे. शनिवारपासून मराठवाड्यात ढगाळ वातावरण तयार झाल्याने पावसाची शक्यता निर्माण झाली आहे. ता.१० मार्च  रोजी औरंगाबाद, बीड, जालना व उस्‍मानाबाद जिल्‍हयात तुरळक ठिकाणी तर ता.१० व ११ मार्च रोजी लातुर, नांदेड, परभणी व हिंगोली जिल्‍हयात तुरळक ठिकाणी अतिशय हलक्‍या स्‍वरूपाच्‍या पावसाची शक्‍यता आहे, अशी माहिती वसंतराव नाईक मराठवाडा कृषी विद्यापीठाच्या ग्रामीण कृषी मौसम सेवा विभागाने दिली आहे.

हेही वाचा -येस बॅंक : परभणीतील ‘या’ बॅंकांचे व्यवहार गडगडले !

रब्बी पिकांची घाईने काढणी करा
पुढील आठवडयात पावसाचा अंदाज लक्षात घेता काढणी न केलेल्‍या व काढणीस तयार असलेल्‍या हरभरा पिकाची लवकरात लवकर काढणी व मळणी करून सुरक्षीत ठिकाणी साठवणूक करावी. काढणीस तयार झालेल्‍या गव्‍हाची लवकर काढणी व मळणी करून सुरक्षित ठिकाणी साठवण करावी. सध्‍याच्‍या काळात हळदीची काढणी, हळद
उकडणे, वाळवणे, पॉलिश करणे ही कामे सुरू आहेत. येत्‍या आठवड्यात पावसाची शक्‍यता असल्‍यामुळे हळदीची उघडयावर साठवण करू नये.`काढणीस तयार असलेल्‍या संत्रा, मोसंबी फळांची लवकरात लवकर काढणी करून प्रतवारी करावी व बाजारपेठेत पाठवावीत, असा सल्ला या विभागाने दिला आहे.