हिंगोली : हिंगोलीचे माजी खासदार अॅड. राजीव सातव यांना राज्यातून काँग्रेसतर्फे राज्यसभेवर पाठविण्याचा निर्णय घेण्यात आला आहे. त्यामुळे जिल्‍ह्यातील काँग्रेस कार्यकर्त्यांतून उत्‍साहाचे वातारण निर्माण झाले असून शुक्रवारी (ता.१३) ते उमेदवारी अर्ज दाखल करणार आहेत. 

महाराष्ट्राच्या कोट्यातून राज्यसभेवर निवडून गेलेल्या सात खासदारांचा कार्यकाळ एप्रिल महिन्यात संपत आहे. त्यामुळे राज्यसभेच्या सात जागांसाठी २६ मार्चला निवडणूक होणार आहे. उमेदवारी अर्ज दाखल करण्याची अंतिम तारीख शुक्रवार (ता. १३) आहे.

संख्याबळानुसार महाविकास आघाडीचे चार; तर भाजपचे तीन उमेदवार निवडून येऊ शकतात. राष्ट्रवादी दोन; तर काँग्रेस-शिवसेना प्रत्येकी एक जागा लढणार आहे. राज्यसभा निवडणुकीसाठी राष्ट्रवादीचे अध्यक्ष शरद पवार यांनी उमेदवारी अर्ज दाखल केला आहे.

हेही वाचा - कुठं सापडलं जळालेल्या अवस्थेतलं प्रेत..

काँग्रेस कार्यकर्त्यांमध्ये उत्साह

काँग्रेसकडून कोणाला उमेदवारी मिळणार याची चर्चा काही दिवसांपासून रंगत होती. अखेर हिंगोलीचे काँग्रेसचे माजी खासदार राजीव सातव यांना उमेदवारी जाहीर करण्यात आली आहे. त्यांची उमेदवारी जाहीर करताच जिल्हाभरातील काँग्रेस कार्यकर्त्यांमध्ये उत्साह दिसून येत आहे. श्री. सातव हे राहुल गांधी यांच्या यंग बिग्रेडमधील त्‍यांचे निकटवर्तीय मानले जातात. राजीव सातव यांना त्‍यांच्या आई माजी मंत्री रजनी सातव यांच्याकडून राजकारणाचे बाळकडू मिळाले आहे.

युवक काँग्रसचे अध्यक्षपद देखील सांभाळले 

राजीव सातव हे पंचायत समिती सदस्य, जिल्‍हा परिषद सदस्य म्हणून निवडणून आले होते. त्यांनी जिल्‍हा परिषदचे कृषी सभापती पद सांभाळले आहे. तसेच २००९ मध्ये त्यांनी कळमनुरी विधानसभेचे नेतृत्‍व केले. तर २०१४ मध्ये ते लोकसभेवर निवडून गेले होते. त्‍यांनी अखिल भारतीय युवक काँग्रसचे अध्यक्षपद देखील सांभाळले आहे. दरम्‍यान २०१९ ची लोकसभा निवडणूक न लढण्याचा निर्णय घेतला होता. त्यांच्या निर्णयामुळे काँग्रेस कार्यकर्त्यांना आश्चर्याचा धक्का बसला होता. 

तुम्ही एलआयसी पॉलिसी काढली असेल, तर आधी हे वाचा

काँग्रेसच्या उमेदवारांना हार पत्करावी लागली

यामुळे जिल्‍ह्यात अनेक तर्क वितर्क लढविण्यात येत होते. त्यानंतर माजी खासदार सुभाष वानखेडे यांनी काँग्रेसतर्फे लोकसभेची निवडणूक लढवली होती. मात्र, त्यांना पराभरावाचा सामना करावा लागला. तसेच कळमनुरी विधानसभेचे काँग्रेसचे उमेदवार माजी आमदार डॉ. संतोष टारफे यांनाही हार पत्करावी लागली. या पराभवामुळे कार्यकर्त्यांचा उत्साह कमी झाला होता.

दरम्‍यान, राहुल गांधी यांचे निकटवर्तीय मानले जाणारे राजीव सातव यांना काँग्रेसतर्फे राज्यसभेवर पाठविण्याची तयारी झाली असून, त्‍यांचे नाव यासाठी निश्चीत झाले आहे. ते शुक्रवारी उमेदवारी देखील दाखल करणार असल्याने जिल्‍ह्यातील काँग्रेस कार्यकर्त्यांमध्ये चैतन्याचे वातावरण निर्माण झाले आहे.