जालना - परतूर येथील व्यापारी राजेश नहार याच्या खूनप्रकरणी दोन संशयितांच्या पोलिसांनी मंगळवारी (ता. 21) रात्री उशिरा मुसक्‍या आवळल्या आहेत. दरम्यान, संशयितांना बुधवारी (ता. 22) न्यायालयासमोर हजर केले असता न्यायालयाने नऊ दिवसांची पोलिस कोठडी सुनावली आहे. दरम्यान, राजेश नहार खून प्रकरणाचे नेमके कारण अद्याप स्पष्ट नसल्याचे चित्र आहे. 

हेही वाचा : राजेश नहारचा गोळ्या झाडून खून 

परतूर येथून जालन्याकडे निघालेले परतूर येथील व्यापारी राजेश नहारचा जालना-वाटूर महामार्गावर शिंगाडे पोखरी फाटा परिसरात ता. 11 जानेवारी रोजी रात्री साडेदहाच्या सुमारास गावठी पिस्तुलाने गोळ्या झाडून खून करण्यात आला होता. या प्रकरणाच्या तपासकामी पोलिसांकडून तीन पथके स्थापन करण्यात आली होती. पोलिसांकडून या प्रकरणाच्या तपासामध्ये कमालीची गुप्तता पाळली जात आहे. या प्रकरणाच्या तपासकामी दहा दिवस स्थानिक गुन्हे शाखेचे पथक परतूर परिसरात तळ ठोकून होते.

हेही वाचा :  नहारचा घात गावठीच्या गोळीनेच... 

दरम्यान, याप्रकरणी मंगळवारी (ता. 21) रात्री उशिरा स्थानिक गुन्हे शाखेने रघुवीरसिंग चंदूसिंग टाक (रा. परतूर, ता. परतूर, जि. जालना), अरविंद ऊर्फ बाळू भदरगे (रा. अंबा, ता. परतूर, जि. जालना) या दोन संशयितांच्या मुसक्‍या आवळल्या. त्यांना मौजपुरी पोलिसांच्या स्वाधीन केले आहे. दरम्यान, या दोन्ही संशयितांना बुधवारी (ता. 21) न्यायालयासमोर हजर केले असता न्यायालयाने नऊ दिवसांची पोलिस कोठडी सुनावली आहे. 

हेही वाचा :  जालना बनलाय गावठी बंदुकवाल्यांचा अड्डा?  

ही कारवाई वरिष्ठांच्या मार्गदर्शनाखाली स्थानिक गुन्हे शाखेचे पोलिस निरीक्षक राजेंद्रसिंह गौर, उपनिरीक्षक दुर्गेश राजपूत, कर्मचारी सॅम्युअल कांबळे, कैलास कुरेवाड, गोकुळसिंग कायटे, प्रशांत देशमुख, विनोद गडदे, अंबादास साबळे, हिरामन फलटणकर, कृष्णा तंगे, सागर बाविस्कर, सचिन चौधरी, संदीप मांटे, विलास चेके यांनी केली. 

खुनाचे कारण अस्पष्ट 

परतूर येथील राजेश नहार याच्या खूनप्रकरणी दोन संशयितांना पोलिसांनी अटक केली असली तर खुनाचे कारण अस्पष्ट आहे. त्यामुळे हा खून नेमक्‍या कोणत्या कारणावरून झाला? यासह गुन्ह्यात वापरलेल्या गावठी पिस्तुलासह अनेक बाबी स्पष्ट होणे बाकी असल्याचे चित्र आहे.