जालना - कोरोना विषाणूच्या पार्श्वभूमीवर पालकमंत्री तथा आरोग्य मंत्री तसेच जिल्हा प्रशासनाने वारंवार सूचना देऊनही खासगी हॉस्पिटल बंद ठेवण्यात येत आहे. त्यामुळे शहरातील खासगी हॉस्पिटलमध्ये औषधोपचारासाठी येणाऱ्या रुग्णांची गैरसोय होत आहे. या बाबीची जिल्हाधिकारी रवींद्र बिनवडे यांनी दखल घेतली असून आपत्तीच्या काळात दवाखाने बंद ठेवणाऱ्या खासगी वैद्यकीय व्यवसायिकांचे नोंदणी प्रमाणात रद्द करण्याचा इशारा त्यांनी दिला आहे.

कोरोना विषाणूच्या प्रादुर्भाव रोखण्यासाठी जिल्हा आरोग्य विभाग युद्ध पातळीवर कष्ट घेत आहे. कोरोना विषाणू बरोबर सारी आजाराचे रुग्णही जिल्ह्यात आढळून आले आहे. तसेच विविध आजाराने ग्रस्त रुग्ण उपचारासाठी जिल्हा व तालुका स्तरावरील खासगी हॉस्पिटलमध्ये तपासणी व उपचारासाठी येत असतात. खासगी दवाखाने बंद ठेवल्यामुळे शासकीय रुग्णालयावर ताण पडत आहे.

हेही वाचा : सार्वजनिक स्थळी थुंकल्यास हजार रुपये दंड 

जिल्ह्यात काही खासगी हॉस्पिटल व वैद्यकीय व्यावसायिक आपले क्लिनिक बंद ठेवत असल्याचे जिल्हाधिकाऱ्यांच्या निदर्शनास आणून देण्यात आले आहे. जिल्हाधिकारी रविंद्र बिनवडे यांनी या प्रकरणाची गांभीर्याने दखल घेतली असून जिल्ह्यातील सर्व नोंदणीकृत वैद्यकीय व्यावसायिकांना त्यांची हॉस्पिटल सलग बंद न ठेवण्याचे आदेश दिले आहे.

हेही वाचा : पोलिसांच्या सुदृढ आरोग्यासाठी अष्टसूत्री

खासगी हॉस्पिटल बंद ठेवल्यास आपत्ती व्यवस्थापन कायद्यानुसार कारवाई करण्यासह संबंधित डॉक्टर व हॉस्पिटलचे नोंदणी प्रमाणपत्र रद्द करण्याचा इशारा जिल्हाधिकारी रविंद्र बिनवडे यांनी जारी केलेल्या परिपत्रकात दिला आहे.