अंबड (जि.जालना) - भंगार, कचरावेचक, भिक्षेकरी, शाळाबाह्य असलेल्या वंचितांची अंबड शहरात आता नववर्षापासून मुक्‍त शाळा भरत आहे. विशेष म्हणजे केवळ अक्षरओळख इतके या शाळेचे स्वरूप नाही, योग-प्राणायाम, संगीत, कराटे प्रशिक्षणही या मुलांना दिले जात आहे. यासाठी समाजभान टीमने पुढाकार घेतला आहे. 

अनेक मुले शाळेपासून दूरच 
पालकांची अनास्था, जागरूकतेचा अभाव आणि पोटाचा प्रश्न यामुळे अनेक मुले शाळेपासून दूरच होती. सकाळी झोपेतून उठल्यानंतर ही मुले शहराच्या कानाकोपऱ्यात भिकेचा कटोरा घेऊन फिरत होती. या मुलांमध्ये शिक्षणातील सातत्य आणि नियमितता यावी यासाठी समाजभान टीमकडून त्यांच्या वस्तीत, वंचितांच्या अंगणातली आनंददायी शाळा सुरू करण्याचा निर्णय घेतला. या शाळेसाठी विजय जाधव, संतोष जाधव, अमोल आडोसा यांनी तात्पुरती जागा उपलब्ध करून दिली. 

हेही वाचा : जालना झेडपीचे अध्यक्षपद अनुसूचित जातीसाठी

मुलांना सर्वांगीन शिक्षण
समाजभानचे दादासाहेब थेटे यांनी या शाळेमध्ये पूर्णवेळ मुलांना शिकविण्याची जबाबदारी उचलली. योग शिक्षणासाठी गणेश मिरकड, कराटे शिक्षणासाठी ज्ञानेश्वर मोरे तर संगीत शिकवणीसाठी श्‍याम उगले सहकार्य करणार आहेत. पहिल्या दिवशी झोळी व कटोरी न घेता वही-पेन घेऊन अनेक मुले शाळेत दाखल झाली.

हेही वाचा :  नवं वर्ष उमेदीचं...​

पहिल्याच दिवशी चाळीस मुले 
फुगे आणि विविध फलकांनी शाळा सजविण्यात आली. अशोक धरमशी यांनी पहिल्या दिवशी या मुलांना मिठाई वाटप केली. फुले दांपत्याने भिडेवाड्यात शाळा सुरू केली होती. हा वसा जपत समाजभान टीमने हा उपक्रम सुरू केला. पहिल्याच दिवशी चाळीस मुलांनी शाळेला हजेरी लावली.

हेही वाचा :   नवीन वर्षात तरी बदनापूर बसस्थानक होईल का? 

अनेकांचा मदतीचा हात
या शाळेसाठी माजी आमदार शिवाजीराव चोथे, अरुण मकासरे यांनीही मदतीचा हात दिला आहे. समाजभानचे संतोष जिगे, अशोक धरमशी, दत्तात्रय शिनगारे, योगेश कव्हळे, अशोक शिंदे, सोपान पाष्टे, भालचंद्र मोरे, राहुल विसपुते, सुभाष बनकर, संतोष वरकड, चंद्रकांत आढाव, प्रकाश जाधव आदींनी परिश्रम घेतले.