सिल्लोड  (जि.औरंगाबाद ) : येथील वॉईन शॉपवरील काम करणाऱ्याचा खुन  करून चार लाख रूपयांची लुट केल्याप्रकरणी बुधवारी (ता.19) अटक करण्यात आलेले संशयित आरोपी अजय गुलाबराव रगडे (वय 30, रा. सातारा परिसर, औरंगाबाद), चेतन अशोक गायकवाड (वय 34, रा. शिक्षक कॉलनी, सिल्लोड), संदीप आसाराम गायकवाड (वय 26, रा. कैकाडी गल्ली, परतूर) यांना गुरुवारी (ता. 19) सिल्लोड शहर पोलिसांनी दुपारी तीनच्या सुमारास न्यायालयात हजर केले.

सिल्लोड शहर पोलिस ठाण्याचे पोलिस निरीक्षक तथा तपास अधिकारी राजेंद्र बोकडे यांनी न्यायालयास विनंती केली की, आरोपींनी हत्येसाठी वापरलेले शस्त्र जप्त करायचे आहे. ज्या शर्टाचे बटन मिळाले त्यासंबंधी पुरावे गोळा करणे बाकी आहे. घटनास्थळावरून चप्पल जप्त केलेली आहे. याबाबतचे पुरावेही गोळा करायचे आहेत. त्यामुळे आरोपींना सात दिवसांची पोलिस कोठडी देण्याची मागणी करण्यात आली.

हेही वाचा ः अभियांत्रिकीच्या विद्यार्थ्याची आत्महत्या

यावर न्यायाधीश आर.पी.थोरे यांनी आरोपींना रविवारपर्यत चार दिवस पोलिस कोठडीत ठेवण्याचे आदेश दिले. आरोपींचे मागील पोलिस रेकॉर्ड व घटना गंभीर स्वरूपाच्या असल्यामुळे कडेकोट पोलिस बंदोबस्तामध्ये आरोपींना न्यायालयात हजर करण्यात आले.

हेही वाचा ः चक्क सेवानिवृत्ती उपजिल्हाधिकाऱ्यांच्या भूखंडवर वाळू साठा 

शहरातील प्रियदर्शनी चौकात असलेल्या एका वॉईन शॉपवर कामावर असलेले कर्मचारी भिकन निळुबा जाधव (वय 48, रा. मोढा, ता. सिल्लोड) तसेच त्यांचा साथीदार लक्ष्मण पुंजाजी मोरे हे ता. 12 मे 2019 रोजी दुकान बंद करून रोख रक्कम घेऊन जयभवानीनगर येथील घरी जात होते. रात्री साडेदहाच्या दरम्यान भराडी रस्त्यावरील जयभवानीनगर परिसरामध्ये
आरोपींनी त्यांच्यावर हल्ला करून रोख रक्कम घेऊन ते पसार झाले होते.
घटनेमध्ये भिकन जाधव यांचा मृत्यू झाला होता.