कळमनुरी ः कळमनुरी-आखाडा बाळापूर मार्गावर सोमवारी (ता. नऊ) दुपारी दोन वाजेच्या दरम्यान नांदेडकडे फरशी घेऊन निघालेल्या ट्रक रस्त्याच्या मधोमध उलटल्यामुळे या मार्गावरची वाहतूक दोन तास ठप्प झाली होती. कळमनुरी व बाळापूर पोलिसांनी घटनास्थळी धाव घेत जेसीबी यंत्राच्या साह्याने उलटलेला ट्रक बाजूला करत वाहतूक सुरळीत केली.

कळमनुरी-नांदेड हा राष्ट्रीय महामार्ग रस्ता खड्ड्यांमुळे अपघातग्रस्त महामार्ग म्हणून ओळखला जाऊ लागला आहे. या रस्त्यांची झालेली दुरवस्था पाहता मागील काही दिवसांत अपघातांचे प्रमाण वाढले आहे. जड वाहतूक करणारी वाहने रस्त्यावर पडलेल्या खड्ड्यांमुळे उलटण्याच्या प्रकारातही वाढ झाली आहे. या राष्ट्रीय महामार्गाच्या बाजूला साईडपट्ट्या भरल्या नसल्यामुळे वाहने उलटून अपघात होत आहेत. 

वाहतूक दोन्ही बाजूंनी थांबली
सोमवारी कळमनुरी- आखाडा बाळापूर मार्गावर पार्टी मोड वळणरस्त्याच्या पुढे कळमनुरी व बाळापूर पोलिस ठाण्याची हद्द असलेल्या मध्यभागी दुपारी दोन वाजता घडला. राजस्थान येथून (एमएच २६ - बीई २७७२) हा ट्रक स्टाईल फरशी घेऊन नांदेडकडे जात असताना खराब रस्त्यामुळे रस्त्याच्या मधोमध उलटला. ट्रकमधील सर्व फरशी रस्त्यावर येऊन पडली, तर उलटलेल्या ट्रकचा भाग रस्त्यावर आडवा झाला. या अपघातानंतर या मार्गावरची वाहतूक दोन्ही बाजूंनी थांबली गेली. 

हेही वाचा - ‘या’ जिल्‍ह्यात अवकाळीचा टाळकी ज्‍वारीला फटका

वाहनांच्या लांबच लांब रांगा
घटनेची माहिती उपस्थितांनी कळमनुरी व बाळापूर पोलिसांना दिली माहिती मिळाल्यानंतर पोलिस निरीक्षक रंजीत भोईटे यांनी कर्मचारी सुनील रिठ्ठे, रवी बांगर, श्री. अंभोरे यांना घटनास्थळी पाठवले. बाळापूर पोलिस ठाण्याचे पोलिस निरीक्षक विकास थोरात, कर्मचारी संजय मार्के, श्री. नागरे हेही घटनास्थळी दाखल झाले. तोपर्यंत या मार्गावरीची दोन्ही बाजूंनी वाहतूक ठप्प झाली. दोन्ही बाजूंनी वाहनांच्या लांबच लांब रांगा लागल्या होत्या. 

हेही वाचा - सुट्टीत सणासाठी युवक घरी परतला अन् असे घडले...

जेसीबी यंत्राने ट्रक बाजूला केल्यावर वाहतूक सुरळीत
घटनास्थळी पोचलेल्या पोलिस अधिकारी व कर्मचाऱ्यांनी परिस्थितीचा अंदाज घेत तातडीने जेसीबी यंत्र घटनास्थळी बोलून रस्त्याच्या मधोमध पडलेला ट्रक व ट्रकमधील फरशी बाजूला केली. त्यानंतर जवळपास दोन तासानंतर या मार्गावरची वाहतूक सुरळीत सुरू झाली. या मार्गावर अपघातांची मालिका अनेक महिन्यांपासून सुरूच आहे.