परभणी : रंगीबेरंगी आकाश पाळणे, महिलांचे विशेष आकर्षण ठरणारी नुमाईश आणि खवय्यांना वेड लावणारी शिरापुरी यंदा परभणीच्या उरुसाचे विशेष आकर्षण असणार आहे. यात्रेत काळानुसार बदल होत आला असला तरी हजरत सय्यद शहा तुराबुल हक्क साहेब यांच्या दर्गावरील रीती, परंपरा गेल्या ८५५ वर्षांपासून आजही त्याच पद्धतीने कायम आहेत.

परभणी शहराच्या पश्चिमेला हजरत सय्यद शहा तुराबुल हक्क साहेब (तुरतपीर बाबा) यांचा दर्गा आहे. हा दर्गा देशभरात प्रसिद्ध आहे. वेगवेगळ्या राज्यातून लोक या ठिकाणी उरूस दर्शनासाठी येत असतात.

दर्शनासाठी लोकांची गर्दी पाहता दरवर्षी या ठिकाणी ता. ३१ जानेवारी ते १८ फेब्रुवारीदरम्यान मोठी यात्रा भरत असते. या यात्रेत व्यवसायासाठी दिल्ली, आंध्रप्रदेश, तेलंगाणा, गुजरात या राज्यांतील अनेक व्यापारी या उरूस यात्रेत येत असतात.

उंच व रंगीबेरंगी आकाश पाळणे हे या यात्रेचे विशेष आकर्षण असते. परभणी शहरासह संपूर्ण जिल्ह्यातील लोक याठिकाणी दर्शन व यात्रेचा आनंद घेण्यासाठी येतात. गेल्या ८५५ वर्षांपासून ही परंपरा आजही त्याच पद्धतीने व रीतिरिवाजाप्रमाणे सुरू आहे.