केंद्रा बुद्रुक ः सेनगाव तालुक्यातील केंद्रा बुद्रुक व परिसरात कोरोनाच्या धास्तीने मजूर शेतात येत नसल्याने भाजीपाल्यासह टोमॅटोचे पीक तोडणीअभावी जागेवरच सुकून जात असल्याने शेतकरी अडचणीत येत आहेत.

केंद्रा बुद्रुकसह कहाकर बुद्रुक, गोंधनखेडा, जामठी बुद्रुक, बटवाडी, वरखेडा, ताकतोडा येथील अल्पभूधारक असलेले शेतकऱ्यांना उपलब्ध असलेल्या पाण्यावर भाजीपाल्याची लागवड केली आहे. दरवर्षी भाजीपाल्याच्या विक्रीतून घरसंसारात त्‍याची चांगली मदत मिळते. या वर्षीदेखील या गावात बहुतांश शेतकऱ्यांनी भाजीपाल्याची लागवड केली आहे. यात टोमॅटो, वांगी, भेंडी, कांदे, कोथिंबीर, चवळी, कांदे, कोबी, पालक आदींचा समावेश आहे.

हेही वाचा - ‘कोरोना’ रिलीफ फंडासाठी सरसावले मदतीचे हात

शेतीतील कामे खोळबंली
मागच्या काही दिवसांपासून भाजीपाल्याची नियमित विक्रीदेखील सुरू झाली होती. मात्र, ऐन भाजीपाला विक्रीला येताच कोरोना आजाराने सर्वत्र थैमान घाण्यास सुरवात केल्याने संचारबंदी सुरू झाल्याने शहरात जाणे बंद झाले आहे. गावातदेखील फिरणे बंद झाले वाहने सीमा बंद झाल्याने प्रवास थांबला आहे. तसेच एका ठिकाणी पाच व्यक्‍ती थांबू नका, अशा वारंवार गावात स्‍पीकरवरून सूचना केल्या जात आहेत. त्‍यामुळे शेतीतील कामे खोळबंली आहेत. शेतात कोणी मजूर येण्यास तयार नाही. त्‍यामुळे गावातील शेतकऱ्यांचा भाजीपाला सध्या शेतातच तोडणीअभावी सुकून जात आहे. त्‍याचा फटका या अल्‍पभूधारक शेतकऱ्यांना बसला आहे. 

हेही वाचा - गहू काढणीसाठी मजूरांची जागा घेतली हार्वेस्‍टरने

पावसानेदेखील भाजीपाल्याचे नुकसान
काही शेतकऱ्यांनी कुटुंबीयांसह शेतात तोडून आणलेल्या भाजीपाला गावात घरपोच देणे सुरू आहे. मात्र, गावात अनेक शेतकऱ्यांकडे भाजीपाला असल्याने त्‍याला कोणी घेण्यास तयार नसल्याने भाजीपाला उत्‍पादकांनी हा भाजीपाला जागेवर ठेवल्याने तो सुकून जात आहे. मागच्या आठवड्यात झालेल्या पावसानेदेखील भाजीपाल्याचे नुकसान झाले असल्याचे शेतकरी सांगत आहेत.

संचारबंदी व कोरोनाची धास्‍ती
पंधरा गुंठ्यांत भेंडी, टोमॅटोची लागवड केली आहे. ते दोन्हीही तोडणीस आले आहेत. मात्र, संचारबंदी व कोरोनाच्या धास्‍तीने त्‍याची तोडणी बंद केल्याने ते जागेवरच सुकून जात आहेत.
-हरी कोरडे, शेतकरी, बटवाडी.