कायगाव : मराठवाड्यातील औरंगाबाद जिल्ह्यात दमदार पाऊस झाला नसला तरी नाशिक जिल्ह्यातील मुसळधार पावसाच्या कृपेने जायकवाडी धरणातील पाणीसाठा १५ टक्क्यांवर पोहोचला आहे. 

मराठवाड्यातील सर्वात मोठे धरण असलेले हे जायकवाडी आठवडाभरापूर्वी मृत साठ्यात होते. सध्या जायकवाडी धरणात गोदावरी नदीपात्रातून जवळपास ७० हजार क्यूसेक्स इतकी आवक सुरू आहे.

नाशिक जिल्ह्यात असाच दमदार पाऊस सुरू राहिला तर औरंगाबाद, जालना या शहरासोबत औरंगाबाद, जालना, नगर या जिल्ह्यातील जवळपास चारशे गावांची वर्षभराची चिंता मिटणार आहे. राज्यातील बहुतांश भागांत जोरदार पाऊस होत असताना अजूनही मराठवाड्यात म्हणावा तसा पाऊस झालेला नाही.