मुंबई : वाहतूक कोंडीवर उपाय म्हणून महापालिका बेस्ट उपक्रमाला 1500 कोटी रुपये देणार आहे; परंतु बेस्टचा अर्थसंकल्प महापालिकेच्या अर्थसंकल्पात विलीन करण्याबाबत आयुक्तांनी कोणताही उल्लेख केलेला नाही. 

हे ही महत्‍वाचे...काँग्रेस म्‍हणतयं आमच ठरलयं

बेस्ट उपक्रमाची आर्थिक स्थिती सक्षम होण्यासाठी महापालिका मदत करत असून, भाडेतत्त्वावर नव्या बस खरेदी करण्यासाठी 1500 कोटी रुपये दिले जाणार आहेत. सध्या बेस्ट उपक्रमाकडे भाडेतत्त्वावरील 231 बसगाड्या आहेत. मार्च 2020 पर्यंत भाडेतत्त्वावरील बसगाड्यांची संख्या 1240 पर्यंत वाढवली जाणार आहे. नवीन बसगाड्या आल्यावर 45 लाख प्रवासी वाढतील, असा विश्‍वास महापालिका आयुक्त प्रवीण परदेशी यांनी महापालिका अर्थसंकल्पात व्यक्त केला आहे. 

बेस्ट बसचे किमान भाडे पाच रुपये केल्यामुळे व भाडेतत्त्वावर बसगाड्या घेतल्यामुळे प्रवाशांची संख्या 33 लाखांवर गेली आहे. प्रवाशांची संख्या 45 लाखांवर नेण्याचे उद्दिष्ट असल्याचे परदेशी यांनी स्पष्ट केले.

महापालिका आर्थिक संकटात असल्याने बेस्ट उपक्रमाला 2000 कोटी रुपये अनुदान दिले होते. या निधीची परतफेड करण्यासाठी भाडेतत्त्वावर बस घेण्यात येणार आहेत. वेतनकराराचा आर्थिक भार आणि कर्मचाऱ्यांचे दैनंदिन वेतन यासाठी हा निधी उपयुक्त ठरेल, असे नमूद करण्यात आले आहे. 

हे ही महत्‍वाचे...प्रवाशांना एसी लोकल नको. आहे त्‍यातच सुधारणा करण्‍याची मागणी

मध्य वैतरणावर वीजप्रकल्प 
बेस्ट उपक्रमाला आर्थिक स्थैर्य मिळावे, यासाठी मध्य वैतरणा प्रकल्पातील पाण्यावर वीजनिर्मिती प्रकल्प राबवण्याचा निर्णय महापालिका प्रशासनाने घेतला आहे. या प्रकल्पातून 25 मेगावॉट वीज निर्माण होईल. राज्य सरकारने या प्रकल्पाला मान्यता दिली असल्याची माहिती महापालिका आयुक्त प्रवीण परदेशी यांनी दिली.