Mumbai Local: मध्य रेल्वेनंतर आता पश्चिम रेल्वेने वातानुकूलित लोकलच्या १७ नवीन लोकल फेऱ्या वाढवण्याचा निर्णय घेतला आहे. त्यानुसार सोमवारपासून (ता. ६) या फेऱ्या धावणार असून, पश्चिम रेल्वेवर धावणाऱ्या एसी लोकलची संख्या ७९ वरून ९६ होणार आहे.

तिकीट दर कपातीनंतर एसी लोकलच्या प्रवासी संख्येत प्रचंड वाढ झाली. त्यात सकाळी आणि सायंकाळी गर्दीच्या वेळेत एसी लोकलमध्ये प्रवासी संख्या मोठी असते. बहुतांश वेळा या लोकलचे दरवाजेही बंद होत नाहीत.

त्यामुळे वाढत्या प्रवाशांची संख्या लक्षात घेऊन मध्य रेल्वेनंतर आता पश्चिम रेल्वेने सोमवारपासून एसी लोकलच्या १७ फेऱ्या वाढविण्याचा निर्णय घेतला आहे. या लोकल सोमवार ते शुक्रवार एसी सेवा म्हणून धावतील; तर शनिवार आणि रविवारी नॉन-एसी सेवा म्हणून धावतील. वाढीव फेऱ्यामुळे पश्चिम रेल्वे मार्गावरील दिवसभरात धावणाऱ्या एकूण लोकलची संख्या एक हजार ३९४ झाली आहे.

याशिवाय डहाणू रोड आणि अंधेरी स्थानकांदरम्यान धावणाऱ्या लोकल चर्चगेट स्थानकापर्यंत चालवण्यात येणार आहेत. या वाढीव फेऱ्यांमध्ये अप मार्गावर नऊ आणि डाऊन मार्गावर आठ एसी लोकल आहेत.

असे असणार एसी लोकलचे वेळापत्रक

• अप मार्ग

• स्थानक प्रकार वेळ

• नालासोपारा-चर्चगेट धीमी पहाटे ४.५५

• बोरिवली-चर्चगेट जलद सकाळी ७.४७, ९.३५, ११.२३

• विरार-चर्चगेट जलद दुपारी १.३४

• विरार-बोरिवली धीमी दुपारी ४.४८

• बोरिवली-चर्चगेट जलद सायंकाळी ५.२८

• विरार-चर्चगेट जलद सायंकाळी ७.५१

• भाईंदर-बोरिवली धीमी रात्री १०.५६

  डाऊन मार्ग

• स्थानक प्रकार वेळ

• चर्चगेट-बोरिवली धीमी सकाळी ६.३५

• चर्चगेट-बोरिवली जलद सकाळी ८.४६

• चर्चगेट-बोरिवली जलद सकाळी १०.३२

• चर्चगेट-विरार जलद दुपारी १२.१६, ३.०७

• चर्चगेट-विरार जलद सायंकाळी ६.२२

• चर्चगेट-भाईंदर धीमी रात्री ९.२३

• बोरिवली-विरार धीमी रात्री ११.१९