मुंबईः मुंबईमध्ये पुन्हा एकदा हिट अँड रनची घटना घडली असून मच्छी आणण्यासाठी गेलेल्या कोळी दाम्पत्याला एका कारने उडवले आणि फरफटत नेले. अपघातामध्ये कोळी महिलेचा मृत्यू झाला आहे. या घटनेमुळे परिसरात संताप व्यक्त होतोय.

रविवारी पहाटे साडेपाच वाजता मच्छी आणण्यासाठी गेलेल्या कोळी दाम्पत्याचा अपघात झाला. वरळीतल्या अॅट्रिया मॉलजवळ ही घटना घडली आहे. वरळी कोळीवाडा परिसरात राहणारे नाकवा दांपत्य हे सकाळी ससून डॉकला मच्छी आणण्यासाठी गेले होते.

मच्छी घेऊन परतत असताना एका चारचाकी गाडीने त्यांच्या दुचाकीला मागून धडक दिली. दुचाकीवर मोठ्या प्रमाणात मच्छी असल्याने गाडीचे नियंत्रण सुटले आणि दोघंही चार चाकी गाडीच्या बोनटवर पडले. अपघात होताच नवऱ्याने वेळीत गाडीच्या बोनटवरून बाजूला उडी टाकली. मात्र महिलेला स्वत:ला बाजूला होता आलं नाही.

अपघातामुळे घाबरलेल्या चालकाने गाडी भरधाव वेगाने पळवली. त्यात कोळी महिलेला त्याने फरफटत नेले. अपघातात कारचालक पळून गेला असून कोळी महिलेला उपचारासाठी नायर रुग्णालयात नेले असता डॉक्टरांनी तिला मृत घोषित केले आहे. या प्रकरणी वरळी पोलिस अधिक तपास करत आहेत.