मुंबईतील गोरेगाव येथे पहाटे एका इमारतीच्या पार्किंगला लागलेल्या भीषण आगीत ८ जणांचा होरपळून मृत्यू झाला आहे, तर ५१ जण जखमी झाले आहेत. यातील मृतांच्या नातेवाईकांना तसेच जखमींवर उपचारांसाठी नुकसान भरपाई जाहीर केली आहे. त्याठिकाणी आज ठाकरे गटाचे नेते आदित्य ठाकरे यांनी भेट दिली. रहिवाशांशी चर्चा केली. घटनेची संपुर्ण माहिती जाणून घेतली.

यावेळी बोलताना आदित्य ठाकरे म्हणाले की, पहाटे ३ वाजण्याच्या सुमारास ही आग लागली. ही घटना दुर्दैवी आहे. या घटनेत ८ जणांना आपला जीव गमवावा लागला आहे. जखमींवर उपचार सुरू आहेत. प्रार्थना इतकीच आहे, आता गंभीर आहेत ते लवकरात लवकर बरे व्हावेत. या संपुर्ण प्रकरणाची चौकशी होईल पण, आज या सर्वांना धीर देणं गरजेचं आहे, असं ते म्हणालेत.

तर आज आपण जिथं उभं आहोत, तिथे दुर्घटना घडली आहे, या गोष्टीचं राजकारण करू नये. कोणत्याही गटाचे नेते असतील तर त्यांनी या दुर्घटनेत राजकारण आणू नये. राजकारण करणं योग्य राहणार नाही. या घटनेची चौकशी होईल पण, गंभीर असतील त्यांच्या चांगल्या होण्यासाठी प्रार्थना करणं गरजेचं आहे, असंही ते म्हणालेत.

कोणत्याही लोकप्रतिनिधीने आज कोणावरही आरोप लावू नयेत. तसं पाहायला गेलं तर विरोधक म्हणून आम्हाला आरोप लावणं सोपं असतं. आज ती वेळ नाही आरोप लावण्याची चौकशी होणारचं आहेत. कोणीही यामध्ये राजकारण करू नये. पण, कितीही कोणीही आरोप केले तरी आम्ही जबाबदार विरोधक आहोत. योग्य ती काळजी घेतली पाहिजे अशा घटना होऊ नये म्हणून उपाययोजना करणे गरजेचे आहे, असंही ठाकरे यावेळी म्हणाले आहेत.