Mumbai Rain: मुंबईमध्ये काल रात्रीपासून मुसळधार पाऊस पडत आहे. अनेक ठिकाणी पाणी साचलं आहे. त्यामुळे जनजीवन विस्कळीत झाले आहे. लोकल आणि रेल्वे उशिराने धावत आहेत. याचा फटका विमान वाहतुकीला देखील बसला आहे. मुंबईहून इतर ठिकाणी जाणाऱ्या अनेक फ्लाईट रद्द करण्यात आल्यात किंवा त्यांची वेळ पुढे ढकलण्यात आली आहे. त्यामुळे विमान प्रवाशांना देखील पावसाची झळ बसली आहे.

पावसाचा परिणाम एक्स्प्रेस रेल्वेवर देखील पडला आहे. डेक्कन क्विन, प्रगती, सिंहगड या पुण्यातून येणाऱ्या रेल्वे रद्द करण्यात आल्या आहेत. त्यामुळे आता एक्स्प्रेसच्या प्रवाशांनी बस स्टँडवर गर्दी केली आहे. याठिकाणी मुंबईला जाण्यासाठी लोकांनी रांग लावली आहे. मुंबईत सकाळी १ ते ७ वाजेपर्यंत ३०० मिलीमीटर पावसाची नोंद झाली आहे. मुंबईकरांना त्यामुळे पावसाचा त्रास सहन करावा लागणार आहे.

मुंबईतील सकाळच्या सत्रातील सर्व शाळा आणि महाविद्यालयांना सुट्टी जाहीर करण्यात आली आहे. शाळेत आलेल्या अनेक विद्यार्थ्यांना परत पाठवण्यात आले आहे. कोणताही अनुचित प्रकार घडू नये यासाठी ही खबरदारी घेण्यात आली आहे. मुंबईकरांना देखील प्रशासनाकडून आव्हान करण्यात आले आहे. गरज नसेल तर बाहेर पडू नका असे आव्हान नागरिकांना करण्यात आले आहे.

मुंबई महानगरात काल मध्यरात्रीनंतर १ वाजेपासून ते आज सकाळी ७ वाजेपर्यंत या सहा तासांच्या कालावधीत विविध ठिकाणी ३०० मिलिमीटर पेक्षा अधिक पावसाची नोंद झाली आहे. काही सखाल भागांमध्ये जोरदार पावसामुळे पाणी साचले आणि उपनगरीय रेल्वे सेवा देखील विस्कळीत झाली आहे.

आज देखील जोरदार पाऊस होण्याची शक्यता वर्तवण्यात आली आहे. या पार्श्वभूमीवर विद्यार्थ्यांची गैरसोय होऊ नये म्हणून मुंबई महानगरातील सर्व महानगरपालिका, शासकीय आणि खासगी माध्यमांच्या शाळांना तसेच महाविद्यालयांच्या पहिल्या सत्रासाठी सुटी जाहीर करण्यात येत आहे. परिस्थितीचा आढावा घेऊन पुढील सत्रांसाठीचा निर्णय जाहीर करण्यात येईल.