मुंबई : अँटिलिया स्फोटक प्रकरणी (Antilia Bomb Scare Case) निलंबित पोलिस अधिकारी सचिन वाझेला (Sachin Waze) अटक झाली होती. एटीएस देखील या प्रकरणाचा तपास करत आहे. याप्रकरणी एटीएसने एक अहवाल सादर केला असून सचिन वाझेबाबत धक्कादायक माहिती समोर आली आहे. (ATS Report Antilia Bomb Scare Case)

स्फोटकांनी भरलेली स्कॉर्पिओ गाडी अंबानींच्या अँटीलिया निवासस्थानी असल्याचं समजताच बॉम्ब निकामी करणारं पथक तिथं पोहोचले. त्यावेळी सचिन वाझे देखील तिथे आले. ते बराच वेळ गाडीजवळ थांबून होते. गाडीची तपासणी करायची असल्यानं त्यांना गाडीपासून लांब जाण्यास सांगितलं. मात्र, वाझे वारंवार कारजवळ येत होते. तिथेच घुटमळत होते. बॉम्ब निकामी पथकाच्या कामात देखील त्यांनी हस्तक्षेप केला. वाझेकडून अनेकदा प्रोटोकॉलचं उल्लंघन करण्यात आलं, अशी धक्कादायक माहिती अहवालातून उघड झाली आहे.

नेमकं काय आहे प्रकरण? -

उद्योगपती मुकेश अंबानी यांच्या अँटीलिया निवासस्थानाबाहेर स्फोटकांनी भरलेली गाडी असल्याची माहिती मुंबई पोलिसांना मिळाली. त्यानंतर एकच खळबळ उडाली होती. याप्रकरणी महाराष्ट्र सरकारने चौकशीचे आदेश दिले होते. ही गाडी ज्या व्यक्तीची होती ते मनसुख हिरेन यांची देखील हत्या करण्यात आली. त्यानंतर एनआयएने सचिन वाझेला अटक केली. याप्रकरणी सध्या सचिन वाझे तुरुंगात आहे. दरम्यान, या प्रकरणात माजी पोलिस आयुक्त परमबीर सिंह यांचा हात असल्याचा आरोप माजी गृहमंत्री अनिल देशमुख यांनी केला आहे. अँटिलिया प्रकरणाचे मास्टरमाईंड परमबीर सिंह होते, असं ईडीच्या जबाबामध्ये देशमुखांनी म्हटलं होतं.