मुंबई : राज्यातील सत्ताधारी महाविकास आघाडी आणि भाजपमध्ये (BJP) गेल्या काही दिवसांपासून मोठा संघर्ष सुरु असल्याचं पाहायला मिळतंय. विशेत: शिवसेना आणि राष्ट्रवादीच्या नेत्यांवर भाजपने आजवर अनेक गंभीर आरोप केले आहेत. त्यातच आता भाजप आमदार आशिष शेलार (Ashish Shelar) यांनी मुंबईतील बेस्टवरून (Best Bus) देखील काही सवाल उपस्थित केले आहे.

आशिष शेलार यांनी 'पाच वर्षांपूर्वी घेतलेल्या 185 गाड्या बेस्टने भंगारात काढल्यात..का?' असा सवाल उपस्थित केला आहे. तसंच पुढे त्यांनी अजूनही काही सवाल उपस्थितल केले आहेत. "बेस्टमध्ये बसचा तुटवडा निर्माण करायचाय का? 2800 कोटींचे टेंडर ज्याला दिलं त्या पाकिस्तानी एजन्ट तुमूलुरीच्या कंपनीच्या ई बसची गरज निर्माण करायचीय का? सारे काही त्या आंतरराष्ट्रीय घोटाळेबाजासाठी सुरु आहे का? ये ना चोलबे!" असे सवाल करत शेलारांनी एक नवा मुद्दा उपस्थित केला आहे.

दरम्यान, आगामी काळातील मुंबई महानगरपालिकेच्या निवडणुकांच्या पार्श्वभूमीवर राजकीय घडामोडींना वेग आला आहे. राज्यात सुरु असलेल्या अनेक घडामोडींच्या मागे निवडणुकाच असल्याचं मत राजकीय विश्लेषकांकडून व्यक्त केलं जातंय. त्यामुळे आता या आरोपांवर मुंबई महानगरपालिकेवर सत्ता असेलल्या शिवसेनेची काय भूमिका असणार, हे पाहणं महत्वाचं ठरणार आहे.