भिवंडी : स्वच्छ भारत अभियानाचे मूल्यांकन करण्याकरिता घेण्यात येणार्‍या 'स्वच्छ सर्वेक्षण 2020' स्पर्धेच्या विविध निकषांपैकी एक असलेल्या कचरामुक्त शहर (garbage free city) मानांकन अंतर्गत भिवडी शहराला 'थ्री-स्टार' रेटिंग मिळाले आहे. केंद्र सरकारच्या गृहनिर्माण व शहरी कार्य मंत्रालयातर्फे मंगळवारी (ता. 19) घोषित झालेल्या कचरामुक्त शहर तारांकित मानांकन स्पर्धेच्या निकालानुसार हे रेटिंग मिळाल्याची माहिती आयुक्त डॉ. प्रवीण आष्टीकर यांनी दिली.

भिवंडी शहरातील घनकचऱ्याचे संकलन व वाहतूक, ओल्या व सुक्‍या कचऱ्याचे वर्गीकरण, क्षेपणभूमीवरील कचऱ्याची शास्त्रोक्त पद्धतीने विल्हेवाट, जलस्त्रोत व नाले सफाई, शहरातील साफसफाई याबाबत नागरिकांच्या प्रतिक्रिया तसेच इतर स्वच्छतेबाबतचे परीक्षण केंद्रीय पथकाने जानेवारी 2020 मध्ये केले होते.

क्लिक करा : रेल्वेकडून टाळेबंदीचा सदुपयोग...मान्सूनपूर्व दुरुस्तीकामांना वेग 

भिवंडी पालिका कार्यक्षेत्रात दररोज सुमारे 280 टन कचरा निर्माण होतो. डम्पिंग ग्राऊंडवर कचरा व्यवस्थापन योग्य पद्धतीने हाताळल्याचा 
निष्कर्ष परीक्षकांनी नोंदवला. भिवंडी पालिकेचा शहरातील कचरा जमा करण्याच्या पद्धतीत काही सुधारणा झाली आहे.

कचरा व्यवस्थापनामध्ये केलेल्या सुधारणोमुळे, तक्रारी सोडविण्यामध्ये आणि कचऱ्याची योग्यरितीने हाताळणी केल्यामुळे पालिकेला हा क्रमांक मिळाला असल्याचे आयुक्त डॉ. आष्टीकर यांनी सांगितले. केंद्र सरकारच्या वतीने 'स्वच्छ भारत अभियान'अंतर्गत घेण्यात आलेल्या या स्पर्धेत दैनंदिन सफाई, हागणदारीमुक्त, प्लास्टिक बंदी, नालेसफाई आदी कामांवर सरकारचा भर होता. त्यानुसार पालिकेचा कारभार सुधारल्याचे परीक्षकांना दिसून आले. 

क्लिक करा : मुंबईतील लोकवस्त्या होताहेत सुन्यासुन्या! बेरोजगारीमुळे स्थलांतर वाढले

नागरिकांकडून आश्चर्य...
  शहरात निर्माण होणारा कचरा रोजच्या रोज उचलला जात आहे. त्याचे वर्गीकरणही केले जात असल्याचा दावा पालिकेकडून केला जात असताना प्रत्यक्षात तसे होत नाही. याशिवाय घंटागाड्या सुद्धा वेळेवर येत नाहीत. असे असताना पालिकेस 'थ्री स्टार' रेटिंग मिळाल्याबद्दल काही नागरिकांनी आश्चर्य व्यक्त केले आहे. कचरा तक्रारीचे प्रमाणही वाढले आहे. मात्र सध्या सर्वत्र चिडीचूप असल्याची प्रतिक्रिया उमटत आहे. 

  महाराष्ट्रातील 34 महापालिका, नगरपालिका गटामध्ये भिवंडी पालिकेस कचरामुक्त अभियानात थ्री स्टार मानांकन मिळाले असून येत्या काळात राष्ट्रीय पातळीवर चांगले मानांकन मिळेल अशी अपेक्षा आहे. 
- डॉ. प्रवीण आष्टीकर
आयुक्त, भिवंडी महापालिका