शिंदे-फडणवीस सरकार स्थापन झाल्यापासून त्यांना इतर पक्षांतील पदाधिकाऱ्यांचा पाठिंबा वाढत चालला आहे. यासंदर्भात नवी मुंबईतील काही माजी नगरसेवकांनी मुख्यमंत्री शिंदे यांची भेट घेत पाठिंबा दिला होता. मात्र त्यातील तीन नगरसेवकांनी नुकताच भाजपमध्ये (BJP) प्रवेश केला आहे. दरम्यान, शिंदे गटातील नेत्यांनी तीव्र नाराजी व्यक्त केली असून भाजप आमदार गणेश नाईक (Ganesh Naik) यांच्या पुढाकारातून हा प्रवेश झाला असल्याची माहिती मिळत आहे.

भाजपचे आमदार नाईक यांच्या या खेळीमुळे नवी मुंबईत शिंदे गट आणि भाजपमध्ये वादाची पहिली ठिणगी पडली असल्याचे बोलले जात आहे. भाजपमध्ये प्रवेश केलेल्या या माजी नगरसेवकांनी नगरविकास खात्याकडून 50-50 लाख रुपयांचा निधी काही दिवसांपूर्वीच मंजूर करून घेतला होता, असा दावाही शिंदे गटातील नेत्यांनी केला आहे. त्यामुळे आता हा वाद चिघळण्याची शक्यता वर्तवण्यात येत आहे.

दरम्यान, नवी मुंबईत डिसेंबर 2021 मध्ये भाजप नगरसेवकांची शिवसेना आणि राष्ट्रवादीमध्ये रांग लावली होती. त्यावेळी भाजपच्या जवळपास 14 नगरसेवक आणि नगरसेविका शिवसेना आणि राष्ट्रवादीमध्ये दाखल झाले होते. यावेळी नवीन गवते, अपर्णा गवते आणि दीपा गवते हेदेखील शिवसेनेत दाखल झाले होते. उद्धव ठाकरे, एकनाथ शिंदेंच्या उपस्थितीत या तिन्ही नगरसेवकांनी शिवबंधन बांधले होते. पण, राज्यात सत्तांतर झाले आणि राज्यात शिंदे आणि भाजपचे सरकार आल्यामुळे तिन्ही नगरसेवकांनी भाजपमध्ये घरवापसी केल्याचे बोलले जात आहे.

यासंदर्भात नवी मुंबई महापालिकेतील माजी विरोधी पक्षनेते विजय चौगुले यांनी नाराजी व्यक्त केली आहे. ते म्हणाले, आज शिंदे व फडणवीसांच्या माध्यमातून युती सरकार आले आहे. असे असताना काही गोष्टी घडू नयेत. नव्या मुंबईचे नेतृत्व जे करतात, ते राजकीयदृष्ट्या परिपक्व आहेत, त्यांनी या गोष्टी करायला नको होते. त्यांचे टायमिंग चुकले, अशी टीका चौगुले यांनी गणेश नाईक यांचे नाव न घेता केली.