गेल्या काही दिवसांपासून भाजप (BJP) आणि महाविकास आघाडी (Mahavikas Aghadi) यांच्यात चांगलीच जुंपल्याचं पहायला मिळत आहे. खास करुन भाजपकडून शिवसेनेला टार्गेट केलं जात आहे. तसंच ईडीचा ससेमिराही सत्ताधाऱ्यांच्या मागं लागल्याचं चित्र आहे. मुंबई महापालिका निवडणुकीच्या (Mumbai Muncipal Election) पार्श्वभूमीवर आरोप-प्रत्यारोपांच्या फैरीही झडत आहे. आता भाजप नेते आशिष शेलार यांनी महापालिकेच्या सत्ताधाऱ्यांवर निशाणा साधलाय. (Ashish Shelar Criticize Shiv Sena)

मुंबई महापालिकेतील 'माजी' कारभाऱ्यांनी आगामी वर्षाचा अर्थसंकल्प सादर केला, तेव्हा कोणत्याही प्रकारची कर वाढ नाही अशा फुशारक्या मारल्या. मग, प्रशासक बसताच मालमत्ता करात वाढ कुठून आली? प्रशासकाच्या आडून हे करायचं ठरलं होत का?, असा थेट सवाल शेलार यांनी सत्ताधाऱ्यांना (शिवसेना) उपस्थित केलाय.

महापालिकेवर प्रशासक बसला असला तरी राज्याच्या सत्तेच्या खुर्चीत तुम्हीच बसला आहात ना? असा सवाल करुन शेलार पुढे म्हणाले, कोरोनामुळं मुंबईकरांचं अर्थकारण बिडलंय हे दिसतंय ना? काही मदत करु शकत नाही, तर किमान मुंबईकरांचा खिसा तर कापू नका. आता मुंबईकरांकडून पण ही 'वसुली' करणार का? अशी टीका त्यांनी सत्ताधारी शिवसेनेवर (Shiv Sena) केलीय.