डोंबिवली - उद्योगमंत्री उदय सामंत यांच्या डोंबिवलीतील दौऱ्यानंतर पालिका प्रशासन खडबडून जागे झाले असून अनधिकृत नळ जोडण्यांवर कारवाई करण्यास पालिका प्रशासनाने सुरुवात केली आहे.

दिवसभरात 133 अनधिकृत नळ जोडण्यांवर कारवाई केली आहे. तसेच ह प्रभागातील ट्युलिप या इमारतीवर अनधिकृत नळ जोडणी केल्याप्रकरणी पालिका प्रशासनाकडून गुन्हा दाखल करण्यात आला आहे.

कल्याण डोंबिवली शहरात अनधिकृत बांधकामांचे जाळे मोठ्या प्रमाणात असून या बांधकामांना पाणी पुरवठा देखील अनधिकृत रित्या केला जात आहे. यामुळे पाण्याचा कोठा वाढवूनही अनेक भागात पाण्याची समस्या ही बारा ही महिने कायम असल्याचे दिसून आले आहे.

काही दिवसांपूर्वीच उद्योगमंत्री सामंत यांनी डोंबिवलीत धाड टाकत पाणी चोरी होत असल्याची बाब उघडकीस आणली. परंतू त्यानंतर पालिका अधिकाऱ्यांनी त्या भागाची पाहणी करत पाणी चोरी झाले नसल्याचे स्पष्ट केले.

या घडलेल्या प्रकारामुळे उद्योगमंत्र्यांचा दौरा तसेच पालिका अधिकाऱ्यांची तपासणी या दोन्ही बाबींवर प्रश्नचिन्ह उपस्थित केले जात आहेत. यामुळे जाग आलेल्या पालिका प्रशासनाने पुन्हा एकदा अनधिकृत नळजोडण्यांवर कारवाई करण्याचे काम हाती घेतले आहे.

गुरुवारी दिवसभरात विविध प्रभागातील सुमारे 133 अनधिकृत नळजोडण्या पालिका प्रशासनाकडून खंडीत करण्यात आल्या. अ प्रभागातील बल्याणी परिसरातील 17 नळजोडण्या, ब प्रभागातील उंबर्डे परिसरातील 5, क प्रभागातील देवानंद भोईर चाळ, चंदनशिवेनगर परिसरातील 21,

जे प्रभागातील अशोकनगर, वालधुनी परिसरातील 13, ड प्रभागातील काटेमानिवली येथील 10, फ प्रभागातील खंबाळपाडा, कांचनगाव परिसरातील 12, ग प्रभागातील नेरुरकर रोड, म्हात्रे नगर, आयरेगाव येथील 12, आय प्रभागातील गोळवली, पिसवली या परिसरातील 22, ह प्रभागातील 15, ई प्रभागातील नांदिवली,

भोपर व देसलेपाडा परिसरातील 6 अनधिकृत नळजोडण्यांवर कारवाई करण्यात आली आहे. ह प्रभागातील ट्युलिप इमारतीवर अनधिकृत नळजोडणी प्रकरणी गुन्हा दाखल करण्यात आला आहे. तर आय प्रभागातील 14 वाणिज्य आस्थापने यांवर गुन्हा दाखल करण्यात येत असल्याची माहिती कार्यकारी अभियंता किरण वाघमारे यांनी दिली.