तुर्भे (बातमीदार) : कोरोनामुळे भविष्यात शाळा केव्हा सुरू होतील याची शाश्वती नाही. म्हणून शैक्षणिक नुकसान होऊ नये यासाठी विद्यार्थ्यांना स्वयंअभ्यासासाठी पीडीएफ फाईल अँप व वेबसाईटद्वारे पुढील वर्षाच्या अभ्यासासाठी दिल्या जात आहेत; परंतु यासाठी हवा असणारा स्मार्टफोन प्रत्येकाकडे असतोच असे नाही. म्हणून केंद्र व राज्य शासनाने पहिली ते बारावी या वर्गाचे अभ्यासक्रम शासकीय दूरचित्रवाणीवर प्रसारीत करावे, अशी मागणी भाजप व पालघर जिल्ह्याचे चिटणीस संजय पवार यांनी केंद्रीय प्रसारणमंत्री प्रकाश जावडेकर व राज्याच्या शिक्षणमंत्री वर्षा गायकवाड यांच्याकडे लेखी निवेदन देऊन केली आहे.

ही बातमी वाचली का? दिलासादायक... ठाण्यातील राष्ट्रवादीच्या कोरोनावर यशस्वी मात

आपल्या स्वतःच्या दीक्षा अँप व इतर वेबसाईटवर विद्यार्थ्यांचे 2020/21 या शैक्षणिक वर्षाचे नुकसान होऊ नये म्हणून पीडीएफ फाईलद्वारे स्वयंअभ्यास करावा म्हणून फाईल टाकल्या आहेत; परंतु या शैक्षणिक फाईल जर घ्यायच्या असतील तर स्मार्टफोन हवा असतो. तसेच त्याला इंटरनेटची जोडणी अत्यावश्यक आहे; परंतु शहरातील झोपडपट्टी, गावठाण व ग्रामीण भागातील बहुतांशी नागरिकांकडे आर्थिक दुर्बलतेमुळे हे साहित्य असतेच असे नाही. त्यामुळे या भागातील विद्यार्थ्यांचे शैक्षणिक नुकसान होण्याची शक्यता आहे. त्यासाठी दूरचित्रवाणी माध्यम योग्य ठरेल, असे पत्रात संजय पवार यांनी म्हटले आहे.

ही बातमी वाचली का? नवी मुंबईत कोरोनाबाधितांची संख्या वाढतीये; वाचा आजची आकडेवारी
 

सध्या सह्याद्री या शासकीय दूरचित्रवाणीवर विद्यार्थ्यांचा अभ्यासक्रम दुपारी 12 ते 2 प्रसारित होत आहे; पण ती वेळ कमी पडत आहे. तसेच सगळ्याच कुटुंबात टीव्ही असतेच असे नाही. म्हणून शासनाने रेडिओ, एफएम रेडिओ अशा मध्यामाचा वापर केला तर साहजिकच ज्यांना अभ्यासाविषयी गोडी आहे, अशा विद्यार्थ्यांना त्याचा फायदा होईल. ते करण्याची गरज आहे.
- सुरेश देशमुख, वरिष्ठ शिक्षक, नवी मुंबई.