मुंबईः सध्या कोरोना व्हायरसनं थैमान घातल आहे. दिवसेंदिवस कोरोनाबाधित रुग्णांचा आकडा वाढताना दिसतोय. मुंबईत कोरोनाचा प्रार्दुभाव सर्वाधिक झाला. कोरोनाचा प्रसार रोखण्यासाठी प्रशासन विविध पातळीवर प्रयत्न करत आहे. सोशल डिस्टन्सिंग आणि लॉकडाऊन काटेकोर पालन केले जाताहेत. अशात लॉकडाऊन जाहीर केल्यानंतर कोणतेही सण आणि उत्सव साजरे करण्यात आले नाहीत. आता मुंबईकरांचा सर्वांत आवडता गणेशोत्सव यंदा साजरा करण्यात येणार नसून घरच्या घरी आणि साध्यापद्धतीनं गणेशोत्सव साजरा करण्यास सांगितलं आहे. काही सार्वजनिक गणेशोत्सव मंडळांनीही गणेशोत्सव साध्यापद्धतीनं साजरा करण्याचा निर्णय घेतला आहे. 

आता बृहन्मुंबई महानगरपालिका (बीएमसी) ने घरगुती गणेशोत्सवासाठी मार्गदर्शक तत्त्वे जाहीर केली आहेत. नागरिकांनी कोरोना व्हायरसच्या पार्श्वभूमीवर त्या नियमांचं पालन करण्याचं आवाहन केलंय. यापूर्वीच सार्वजनिक गणेशोत्सवासाठी पालिकेनं मार्गदर्शक सूचना निश्चित केलीय. 

हेही वाचाः  चक्क मुंबई पोलिसचं सांगताहेत नागरिकांना मास्क घालण्याची योग्य पद्धत

सोशल डिस्टन्सिंग कायम ठेवण्यासाठी नागरिकांनी बाप्पाचं विसर्जन घरीचं करावं किंवा शक्य असल्यास गणपती पुढच्या वर्षी विसर्जित करावा असं सुचवलं आहे. तसंच धातु किंवा शाडू (नैसर्गिक) च्या मातीची मूर्ती स्थापित करण्याचंही सुचवण्यात आलं आहे जेणेकरून घरीच विसर्जन होऊ शकेल. एखाद्या भाग सीलबंद झाल्यानंतरही नियमांचं पालन करण्याचं आवाहनही बीएमसीनं नागरिकांना केलं आहे. नियमांनुसार अशा भागात फक्त अत्यावश्यक सेवांना परवानगी देण्यात येणारेय. 

महापालिकेनेही नागरिकांना मूर्तीची उंची दोन फूटांपेक्षा कमी ठेवण्याचे आवाहन केले आहे. तसंच पाचपेक्षा कमी लोकांसह आगमन आणि विसर्जन मिरवणुका लहान ठेवण्यास सांगितलंय. 

अधिक वाचाः  अरे वाह... ही तर दिलासा देणारी बातमी! मुंबईतील रुग्ण दुप्पटीचा कालावधी गेला इतक्या दिवसांवर
 

मुंबई महापालिकेची मार्गदर्शक तत्त्वे

• विसर्जन मिरवणुकीत भाग घेणार्‍या सर्व नागरिकांनी मास्क घालणं अनिवार्य आहे. तसंच फेस शिल्ड्स, सॅनिटायझरचा वापर आणि सोशल डिस्टन्सिंगचं पालन करावं लागेल. 
• शाडू मातीची मूर्ती किंवा धातूची मूर्ती स्थापित करण्याचा प्रयत्न करा जेणेकरून घरीच विसर्जन होऊ शकेल. 
• शक्य असल्यास माघी गणेशोत्सवात किंवा पुढच्या वर्षी विसर्जन पुढे ढकलण्याचा प्रयत्न करा. 
• जर घरात विसर्जन शक्य नसेल तर लोक जवळच्या कृत्रिम तलावांमध्ये विसर्जन करु शकतात.  विसर्जनासाठी नैसर्गिक तलाव किंवा समुद्रकिनार्यावर जाऊ नये. 
• विसर्जन ठिकाणी विलंब होऊ नये म्हणून घरीच विसर्जन आरती करा. 
• लहान मुलं आणि ज्येष्ठ नागरिकांना विसर्जन मिरवणुकीपासून दूर ठेवले पाहिजे. 
• जर एखादा भाग कंटेन्मेंट झोन म्हणून घोषित केल्यास रहिवाशांना नियमांचे पालन करावं लागेल.
• कंटेन्मेंट झोनमध्ये केवळ आवश्यक सेवांना परवानगी असेल आणि रहिवासी सीलबंद भागात प्रवेश करू शकत नाहीत किंवा बाहेर पडू शकत नाहीत.

Civic Body Guidelines Ganeshotsav At Home Ganesh Chaturthi 2020