ठाणे : कोरोना प्रादुर्भावाच्या काळात महापालिकेचे काम करीत असताना अनेक कर्मचाऱ्यांना कोरोना झाला. या काळात कर्मचाऱ्यांना कर्तव्यावर असताना कोरोना झाला असल्याने त्यांना या सुट्टीच्या कालावधीत भर पगारी रजा द्यावी अशी सूचना महापौर नरेश म्हस्के यांनी महापालिका प्रशासनाला केली आहे. 

अधिक वाचाः  किल्ल्यांच्या संवर्धनासाठी 'फोर्ट फाऊंडेशन' उभारणार, छत्रपती संभाजी राजेंकडून घोडबंदर किल्ल्यांची पाहणी

कोव्हिड-19 प्रतिबंधासाठी ठाणे महानगरपालिकेच्या वतीने सर्वोतोपरी उपाय योजना केल्या जात असताना महानगरपालिकेचे अधिकारी व कर्मचारी प्रभावी अंमलबजावणी करण्याच्या दृष्टीने अथक परिश्रम घेत आहेत. कोरोना विरोधातील ही लढाई संपूर्ण क्षमतेने लढली जात असताना काही अधिकारी व कर्मचारी कोरोना बाधित झाल्याने काही रुग्णांना रुग्णालयात तसेच काही रुग्णांना महानगरपालिकेने दाखल केलेल्या संस्थात्मक विलगीकरण केंद्रात दाखल करण्यात आले आहे. तसेच काही रुग्णांना घरीच विलगीकरण करुन राहण्यासाठी सुचित करण्यात आले आहे.

हेही वाचाः मुंबईतील कोरोना रूग्णांच्या मृत्यूमागे `ही` बाब ठरतेय कारणीभूत; नागरिकांकडून अद्यापही होतंय दुर्लक्ष

अशा प्रकारे कोरोना विषाणूचा संसर्ग होऊन कोरोनाबाधित झालेल्या ठाणे महानगरपालिकेच्या आस्थापनेवरील तसेच कंत्राटी मानधनावरील अधिकारी व कर्मचारी यांची या कालावधीतील अनुपस्थिती ही गैरहजेरी न धरता "कर्तव्य कालावधी" म्हणून मानण्यात यावा. यामध्ये कोणत्याही प्रकारचा रजेचा अर्ज घेण्यात येऊ नये व त्यांच्या वेतनात कोणतीही कपात न करता त्यांना संपूर्ण वेतन अदा करण्यात यावे, अशा प्रकारचा प्रस्ताव तयार करण्याची सूचना महापौरांनी केली आहे. अशाप्रकारे कार्यवाही केल्यास अधिकारी व कर्मचारी यांना प्रोत्साहन मिळून जोमाने कामे करतील आणि कोरोनाचा सामना सक्षमतेने होईल, असा विश्वास महापौरांनी व्यक्त केला आहे. 

(संपादन : वैभव गाटे)

compensation leave in case of corona while serving covid Thane mayor