शहापूर/वासिंद : ठाणे जिल्ह्याच्या ग्रामीण भागात कोरोनाचा प्रसार हळूहळू वाढत चालला आहे. विशेषतः शहापूर तालुक्यात पहिल्या लॉकडाऊनकाळात एकही रुग्ण आढळला नव्हता. मात्र, दुसऱ्या लॉकडाऊनमध्ये शहापूर शहरात एक कोरोनाबाधित आढळून आल्यानंतर दिवसेंदिवस येथील कोरोना बाधितांचा आकडा वाढतच चालल्याचे समोर येत आहे. शुक्रवारी (ता. 1) रात्री शहापूर शहरात एकाच वेळी तीन रुग्ण आढळून आल्यानंतर वासिंद येथेही शनिवारी दोन आणि किन्हवली परिसरात 1 कोरोनाबाधित रुग्ण आढळून आल्याने तालुक्यात भीतीचे वातावरण पसरले आहे. 

शहापुरात 17 एप्रिलला तहसील कार्यालय परिसरात वास्तव्याला असणारा पहिला रुग्ण आढळून आला. त्यानंतर वासिंद येथे एक असे दोन रुग्ण याआधी कोरोना विषाणूने बाधित असल्याचे आढळून आले होते. त्यानंतर शुक्रवारी शहापुरातील तावडे नगर येथील एक, गोठेघर येथील एक व कसारा येथे विलगिकरण कक्षातील एक असे तीन रुग्ण कोरोना विषाणूने बाधित असल्याचा अहवाल प्राप्त झाला.

तर कसारा येथील विलागीकरण कक्षातील अन्य दोघे जण संशयित असल्याचे आरोग्य विभागाकडून सांगण्यात आले. दरम्यान, तीन बाधित रुग्णांना ठाणे जिल्हा रुग्णालयात दाखल करण्यात आल्याची माहिती तालुका आरोग्य अधिकारी डॉ. तरुलता धानके यांनी दिली. 

क्लिक करा : कोकणातून आंबा वाहतूक रोडावली, काय आहेत कारणे?

दरम्यान, वासिंद येथे आढळलेल्या कोरोना पॉझिटिव्ह रुग्णाच्या संपर्कात आलेल्यांमधील विलगीकरण केलेल्या व्यक्तींपैकी वासिंदमधील दोन आणि शहापूरचा एक अशा तीन जणांचा अहवाल पॉझिटिव्ह आला आहे. वासिंदमध्ये रहात असलेला आणि मुंबई महापालिकेच्या कुर्ला येथील रुग्णालयात आरोग्य विभागाचा कर्मचारी बुधवारी (ता. 29) कोरोना पॉझिटिव्ह आढळला होता.

त्याच्या संपर्कातील हायरिस्क सात जणांचे विलगीकरण करण्यात आले होते. त्यांच्या तपासणीसाठी पाठवलेला स्वॅब रिपोर्ट रविवारी (ता. 3) मिळाला असून वासिंदमध्ये राहणाऱ्या रुग्णाची पत्नी आणि मुलगी, तर शहापुरातील एक असे तीन जण पॉझिटिव्ह आढळले आहे. त्यांना उपचारासाठी ठाणे येथे दाखल करण्यात आले आहे. 

तर दहागाव आश्रमशाळेत विलगीकरण कक्षातील सात जणांचा स्वॅब तपासणीसाठी पाठवण्यात आला होता. त्यापैकी तीन जणांचा अहवाल पॉझिटिव्ह, तर उर्वरित चार जणांचा अहवाल निगेटिव्ह आला असल्याची माहिती वासिंद प्राथमिक आरोग्य केंद्राधिकारी डॉ. विनय देवळालकर यांनी दिली.

किन्हवली भागातही पहिला कोरोनाबाधित
किन्हवली परिसरातील खरीड येथे कोरोना पॉझिटिव्ह रुग्ण आढळून आल्याने परिसरात भीतीचे वातावरण आहे. खबरदारीचा उपाय म्हणून गावाची तीन किलोमीटरपर्यंतची हद्द सील केली आहे. शहापूर येथील गोठेघरमधील एका कोरोना पॉझिटिव्ह रुग्णाच्या संपर्कात आल्याने किन्हवली परिसरातील खरीड येथील एकाला कोरोनाचा संसर्ग झाला. त्याला ठाणे सिव्हिल रुग्णालयात उपचारासाठी दाखल केले आहे. हा रुग्ण बृहन्मुंबई महापालिकेत सेवेत आहे. ग्रामीण भागातील हा पहिलाच रुग्ण असून, रुग्णाच्या कुटुंबातील 6 जणांना होम क्वारंटाईन करण्यात आले आहे. 

आरोग्य विभागाकडून सर्वेक्षण
कोरोना संसर्गाच्या पार्श्वभूमीवर शहापूरमध्ये पुन्हा आरोग्य विभागाकडून सर्व्हे करण्यात येणार आहे. शहापूर, गोठेघर व कसाऱ्यात आढळलेल्या पॉझिटिव्ह रुग्णांच्या वास्तव्याच्या ठिकाणाला केंद्रबिंदू ठरवून हा सर्व्हे करण्यात येत आहे. हा सर्व्हे पुढील 14 दिवस चालणार आहे. या सर्व्हेमध्ये सर्व पॉझिटिव रुग्णांच्या संपर्कातील अतिजोखमीच्या व कमी जोखमीच्या व्यक्तींची नावे चौकशीतून निष्पन्न झाल्यानंतर त्या व्यक्तींना क्वारंटाईन करून त्यांची स्वॅब चाचणी केली जाणार असल्याची माहिती आरोग्य अधिकारी डॉ. तरुलता धानके यांनी दिली.

क्लिक करा : ठाणेकरांच्या मदतीने परप्रांतीयांच्या स्थलांतरणाचा मार्ग सुकर

खर्डी तीन दिवस पूर्ण लॉकडाऊन
शहापुरात कोरोनाबाधितांच्या वाढत्या संख्येमुळे खर्डी ग्रामपंचायतीने सोमवार (ता. 4) ते बुधवार (ता. 6) पर्यंत वैद्यकीय सेवा वगळता पूर्ण लॉकडाऊन करण्याची घोषणा केली आहे. सध्या खर्डीत सकाळी 8 ते 2 दरम्यान अत्यावश्यक सेवांसह सर्वच दुकाने उघडली जात आहेत. यावेळी सोशल डिस्टन्सिंगसह सर्वच नियमांची पायमल्ली होताना दिसून येत आहे. ग्रामपंचायत पदाधिकारी, खर्डी पोलिस व व्यापारी असोशिएशन यांनी बैठक घेऊन 3 दिवस पूर्ण लॉकडाऊनचा निर्णय घेतल्याचे माजी सरपंच सचिन जाधव यांनी सांगितले.

मुरबाडमध्येही तीन दिवस दुकाने, रस्ते बंद
मुरबाड शहराच्या आजूबाजूच्या परिसरात कोरोना संसर्ग असलेल्या व्यक्ती आढळल्याने खबरदारीचा उपाय म्हणून मुरबाड नगर पंचायतीने  शहरातील सर्व दुकाने आजपासून 5 मेपर्यंत बंद ठेवण्याचा निर्णय घेतला आहे. काही उत्साही नागरिकांनी म्हसा रस्त्यावरून शहरात येणारे रस्ते संभाजी नगर आणि हनुमान आळी अशा दोन ठिकाणी अडथळे उभारून बंद केले आहेत.