वसई : यंदाच्या अर्थसंकल्पात (Budget) पालघर जिल्ह्यातील (Palghar) डहाणू व तलासरी या तालुक्यांसाठी १९४ कोटी ६२ लाखांची भरीव आर्थिक तरतूद (Financial Provision) केली आहे. या निधीतून शिक्षणाचा प्रसार व्हावा याकरिता आदिवासी आश्रमशाळा व वसतिगृहाचा विकास व अन्य कामे केली जाणार आहेत. तसेच नगर परिषद व नगर पंचायतीमधील ग्रामीण भागातील विकास कामांना (Development work) गती दिली जाणार आहे.

डहाणू विधानसभा क्षेत्रात मोठ्या प्रमाणात आदिवासी क्षेत्र आहे. या ठिकाणी सर्वांगीण विकास करता यावा व येथील भागाला आर्थिकदृष्ट्या सक्षम करता यावे याकरिता आमदार विनोद निकोले प्रयत्न करत आहेत. त्यांच्या प्रयत्नांमुळे अर्थसंकल्पात डहाणू आणि तलासरी तालुक्यांतील आदिवासी आश्रम शाळा वसतिगृह सुधारणे, नवीन प्रशासकीय इमारत उभारणे व रस्ते, पूल, राजमार्ग दुरुस्ती, वाहतूक व्यवस्था सुधारणा आदींसाठी आर्थिक तरतूद करण्यात आली आहे. येत्या दोन तालुक्यांची येत्या दोन वर्षांत कामे मार्गी लागणार आहेत.

आश्रमशाळा दुरुस्ती चार कोटी ११ लाख तसेच वसतिगृह व आश्रमशाळेत शिक्षणाच्या प्रसारासाठी सहा कोटी ५९ लाख, प्रमुख जिल्हा मार्ग व राज्य मार्ग या रस्त्यांच्या दुरुस्तीकरिता सात कोटी ६० लाख, दोन्ही तालुक्यांतील रस्तेदुरुस्तीसाठी ७६ लाख, रस्ते, पूल निर्मितीकरिता १६४ कोटी ४२ लाख रुपयांची तरतूद करण्यात आली आहे. २०२२-२०२३ च्या अर्थसंकल्पात पालघर जिल्ह्याच्या विकासाला प्राधान्य देण्यात आले असून १९४ कोटी ६२ लाख रुपयांचा निधी मंजूर करण्यात आल्याने नागरिकांतून समाधान व्यक्त केले जात आहे.

डहाणू नगरपरिषद व तलासरी नगरपंचायतीत डॉ. बाबासाहेब आंबेडकर दलित वस्ती विकास योजनेंतर्गत निधी, आदिवासी विकास विभागाचा निधी, असे शासकीय योजना व निधीसाठी सरकारकडे पाठपुरावा करणार असून शेतकऱ्यांना आर्थिकदृष्ट्या सक्षम करता यावे याकरिता प्रयत्न करणार आहे.

- कॉ. विनोद निकोले, आमदार