शहापूर : महाराष्ट्र सरकारच्या निर्णयाप्रमाणे स्थानिक भूमिपुत्रांना नोकरीत ८० टक्के प्राधान्य असतानाही स्थानिक भूमिपुत्रांना रोजगारमिळत नाही. शहापूर तालुक्‍यातील वासिंद, आटगाव, आसनगाव आदी ठिकाणी असलेल्या एमआयडीसीमध्ये मोठ्या प्रमाणात लहान-मोठे उद्योगधंदे व कंपन्या आहेत. यामध्ये मोठ्या प्रमाणात परप्रांतीय कामगारांना रोजगार दिला जात आहे. त्यामुळे स्थानिक भूमिपुत्रांना रोजगारासाठी वणवण फिरावे लागते.

तालुक्‍यातील सर्वच कंपन्यामध्ये प्रथम स्थानिक भूमिपुत्रांना प्राधान्य द्याव, अशी भूमिका महाराष्ट्र नवनिर्माण विद्यार्थी सेनेचे उपजिल्हा अध्यक्ष देवेंद्र निचिते यांनी शहापूरच्या तहसीलदारांना दिलेल्या निवेदनातून व्यक्त केली आहे. तसेच तालुक्‍यातील कंपन्यांमध्ये ८० टक्के स्थानिकांना रोजगार न मिळाल्यास महाराष्ट्र नवनिर्माण विद्यार्थी सेना स्थानिक भूमिपुत्रांच्या न्याय्य हक्कांसाठी रस्त्यावर उतरेल, असा इशारा दिला आहे.