मुंबई: रेमडेसिवीर इंजेक्‍शन कोरोनासाठी कुचकामी असल्याचे जागतिक आरोग्य संघटनेने (डब्लूएचओ) म्हटले आहे. काही देशांमध्ये केलेल्या सर्वेक्षणातून हा निष्कर्ष काढण्यात आला आहे. त्यामुळे भारतात सर्वाधिक वापरल्या जाणाऱ्या या इंजेक्‍शनच्या उपयुक्ततेवर प्रश्नचिन्ह उपस्थित झाले आहे. 

BMC स्थायी समितीच्या बैठकीचा वाद आता उच्च न्यायालयात; मंगळवारी होणार तातडीने सुनावणी

कोरोनाबाधित रुग्णांवर जगभरात रेमडेसिवीर, लोपोनाईल, रोटोनाईल ही औषधे वापरली जात होती. रेमडेसिवीरमुळे रुग्ण लवकर बरा होतो. तसेच मृत्युदरातही घट होत असल्याचे सांगितले जात होते; मात्र ही औषधे कोरोनासाठी कुचकामी असल्याचे जागतिक आरोग्य संघटनेने नुकतेच जाहीर केले. त्यामुळे ही औषधे वापरायची की नाही, याबाबत संभ्रम निर्माण झाला आहे. जागतिक आरोग्य संघटनेने 70 देशांतील 250 रुग्णालयात एकता चाचणी घेतली. या चाचणीमध्ये त्यांनी कोरोनावर वापरल्या जाणाऱ्या रेमडेसिवीर, इंट्रोफिरॉन, लोपोनाईल, रोटोनाईल, टॉसिलीझुमॅब या औषधांची उपयुक्तता तपासली. त्यातील हाड्रोक्‍सीक्‍लोरोक्वीन आणि लोपोनाईल, रोटोनाईल ही औषधे जूनमध्येच बंद करण्यात आली; तर रेमडेसिवीर आणि इंट्रोफिरॉन औषधे ही कोरोना रुग्णांसाठी उपयुक्त नसल्याचे समोर आले आहे. 

मास्क न लावणाऱ्यांवर कारवाई करणाऱ्या कर्मचाऱ्यांचा मनस्ताप वाढला

कोरोना संसर्गावर सध्या ठोस औषध नसले तरी रेमडेसिवीर, हायड्रॉक्‍सीक्‍लोरोक्वीन, टॉसिलीझुमॅब, इटॉलिझुमॅब, लोपोनाईल, रोटोनाईल ही औषधे वापरली जात होती. त्यातील एकही औषध कोरोना रुग्णांसाठी उपयुक्त नसल्याचे समोर आले आहे. त्यामुळे ही औषधे कोरोना रुग्णांसाठी वापरणे काहीही उपयोगाचे नसल्याने रुग्णांसाठी ऑक्‍सिजनची व्यवस्था तसेच स्टोरॉईडचा वापर करणे अधिक गरजेचे आहे. 
- डॉ. ईश्वर गिलाडा,
संक्रमण रोगतज्ज्ञ 

जागतिक आरोग्य संघटनेच्या निष्कर्षामुळे रुग्णांच्या उपचारासाठी नेमके कोणते औषधे वापरायचे याबाबत संभ्रम निर्माण झाला आहे. भारतात रेमडेसिवीर इंजेक्‍शनचा मोठ्या प्रमाणावर वापर केला जातो. या इंजेक्‍शनमुळे रुग्णाला बरे वाटत असल्याचा अनेक डॉक्‍टरांचा निष्कर्ष आहे. कोरोनावर ठोस औषध येईपर्यंत हे औषध वापरण्याशिवाय पर्याय नाही. 
- डॉ. अविनाश भोंडवे,
अध्यक्ष, भारतीय वैद्यकीय संघटना (महाराष्ट्र) 

-------------------------------------------------

( संपादन - तुषार सोनवणे )