डोंबिवली : - शिक्षीका असलेल्या पत्नीचं इन्क्रिमेंट होत नसल्याच्या रागातून पतीने रागाच्या भरात शाळेच्या मुख्याध्यापकावर धारदार शस्त्राने हल्ला केल्याची घटना घडली आहे. या हल्ल्यात जखमी झालेल्या मुख्याध्यापकावर खासगी रुग्णालयात उपचार सुरु आहेत. डोंबिवली जीआरपी पोलिसांनी शिक्षिकेचा पती शकील शेख याला अटक केली आहे. शाळेच्या सर्व्हीस बुकमध्ये नोंद न झाल्याने शिक्षिकेचे इन्क्रीमेंट होत नव्हते. या कारणावरुन शिक्षिका आणि मुख्याध्यापक यांच्यात नेहमी वाद होत होता.

मिनाज शेख या खारबावला येथील शाळेत शिक्षिका म्हणून कार्यरत आहेत. शेख यांची सर्व्हीस बुकात नोंद केली जात नव्हती. त्यामुळे त्यांचे इन्क्रीमेंट होत नव्हते. यावरुन शेख आणि मुख्याध्यपक भागवत गुरव यांच्यात नेहमी वाद होत हाेता. अनेक वेळा विनंती करुन देखील शेख यांची विनंती मान्य केली जात नव्हती. शेवटी त्यांनी हा प्रकार त्यांच्या पतीला सांगितला. त्याला या गोष्टीचा राग अनावर झाला.

शिक्षिकेचा पती शकील शेख याने मुख्याध्यापक भागवत गुरुव यांना दिवा वसई मार्गावरील खारबाव रेल्वे स्टेशनजवळ गाठले. तूला जीवंत सोडणार नाही असे म्हणत त्यांच्यावर धारदार हत्याराने हल्ला करुन जीवे ठार मारण्याचा प्रयत्न केला. या हल्ल्यात मुख्याध्यापक गुरव गंभीर जखमी झाले. त्यांना तात्काळ नजीकच्या रुग्णालयात उपचारासाठी दाखल केले गेले. त्यानंतर कल्याणच्या खाजगी रुग्णालयात हलविण्यात आले आहे.

भागवत गुरव हे कल्याणला राहणारे असून ते दररोज कल्याण ते खारबावला असा प्रवास करतात. त्यांच्या या प्रवासाच्या वेळेची शकील शेख याला माहिती होती. ती वेळ साधतच शकीलने रेल्वे रेल्वे स्टेशनवर गुरव यांच्यावर हल्ला केला. हल्ला केल्यानंतर शकीलने तेथून पळ काढला. परंतु डोंबिवली जीआरपी पोलिसांनी या प्रकरणात तात्काळ लक्ष घालत फरार आरोपी शकील शेखला अटक करत त्याच्या विरोधात गुन्हा दाखल केला आहे.