मुंबई : कोरोनाशी मुकाबला करायचा असेल, तर जास्तीत जास्त चाचण्या करणे गरजेचे आहे. विकसीत देशांत मोठ्या प्रमाणात चाचण्या केल्याने त्यांच्याकेड रुग्णांची संख्या अधिक दिसत असली तरीही त्यामुळे कोरोनाचे निदान करणे त्यांना सोपे गेले. भारतात आतापर्यंत झालेल्या चाचण्यापैकी 18 टक्के चाचण्या महाराष्ट्रात झाल्या आहेत. आश्चर्य म्हणजे एकट्या मुंबई शहरात झालेल्या चाचण्या एवढ्या चाचण्या अन्य कोणत्याही राज्यात झाल्या नाहीत.

महत्वाची बातमी ः काळजी घ्या ठाणेकरांनो! शहारातील कोरोनाबाधितांची संख्या शंभरीपार

देशभरात 13 एप्रिलपर्यत कोरोनाच्या 2 लाख 17 हजार 554 चाचण्या झाल्या होत्या. त्यापैकी महाराष्ट्रात 41 हजार म्हणजे 18 टक्के चाचण्या झाल्या होत्या. तर मुंबईत 27 हजार 397 चाचण्या म्हणजे 12 टक्के चाचण्या झाल्या आहेत. महाराष्ट्रा खालोखाल केरळ 15 हजार 683, तामिळनाडू 12 हजार 746 आणि दिल्ली येथे 11 हजार 709 चाचण्या झाल्या आहेत. कोरोनाला रोखायचे असल्यास जास्तीत जास्त चाचण्या करणे गरजेचे आहे. मात्र, संपूर्ण देशातच चाचण्यासाठी आवश्यक असलेल्या किट्सची मर्यादा आहे. तरीही जास्तीत जास्त चाचण्या करुन रुग्ण शोधण्यावर महाराष्ट्र सरकार भर देत आहे.

मोठी बातमी ः धक्कादायक! 24 तासांत 5 पोलिसांना कोरोनाची लागण 

राज्यात आढळलेल्या रुग्णांपैकी 70 टक्क्यांपेक्षा अधिक रुग्णांमध्ये आजाराबाबत कोणतीही लक्षणे आढळलेली नाहीत. फक्त त्यांची चाचणी झाली म्हणून बाधा झाल्याचे लक्षात आले होते. अशा वेळी विषाणूचे हे सायलंट कॅरियर धोकादायक ठरु शकतात. त्यामुळे मुंबई आणि राज्याने जास्तीत जास्त चाचण्या करण्याचे सूत्र अवलंबले आहे.