Two missing kids found dead in car: मुंबईतून एक धक्कादायक बातमी समोर आली आहे. एका कारमध्ये दोन चिमुकल्यांचे मृतदेह सापडल्याने परिसरात एकच खळबळ उडाली. मुंबईतील अँटॉप हिल परिसरात हा धक्कादायक प्रकार उघडकीस आला आहे. मृतांमध्ये एका 7 वर्षांच्या मुलाचा आणि 5 वर्षांच्या मुलीचा समावेश आहेत.

याप्रकरणी अँटॉप हिल पोलीस ठाण्यामध्ये बेपत्ता व्यक्तींची तक्रार दाखल करण्यात आली होती. दोन मुलांच्या दुर्दैवी मृत्यूमुळे कुटुंबियांवर शोककळा पसरली आहे. साजिद मोहम्मद शेख (वय वर्षे ७) आणि रीना, (वय वर्षे 5) या दोघा बहीण भावांचा मृत्यू झाला आहे.

मिळालेल्या माहितीनुसार, मृत ७ वर्षांचा मुलगा आणि त्याची ५ वर्षांची बहीण अँटॉप हिल परिसरात आपल्या आई-वडिलांसह राहत होते. बुधवारी दुपारच्या सुमारास ते दोघे खेळण्यासाठी बाहेर पडले. बरात वेळ झाला तरी ते घरी परत न आल्याने कुटुंबियांनी शोध सुरू केला. मुलं न सापडल्याने त्यांच्या आई-वडिलांनी अँटॉप हिल पोलिस स्टेशनमध्ये दोन्ही मुले बेपत्ता झाल्याची तक्रार दाखल केली.

पोलिसांनी तातडीने मुलं बेपत्ता झाल्याची तक्रार नोंदवून घेत तपास सुरू केला. त्या परिसरातील सीसीटीव्ही फुटेज तपासून आणि आजूबाजूच्या परिसरात शोध घेतल्यानंतर पोलिसांना एका जुन्या कारमध्ये मुलांचे मृतदेह आढळले. मुले कारमध्ये खेळत असताना त्यातच अडकली आणि गुदमरल्यामुळे त्यांचा मृत्यू झाला असावा असा संशय पोलिसांनी व्यक्त केला आहे. याप्रकरणी अधिक तपास सुरू आहे.