मुंबईत (Mumbai News) वाढत्या कोरोना आणि ओमिक्रॉन संसर्गाच्या (Corona and Omicron infections) पार्श्वभूमीवर जमावबंदी लागू करण्यात आली आहे. त्यामुळं आझाद मैदानात (Aazad Maidan) आंदोलनाला बसलेल्या एसटी कर्मचाऱ्यांना (ST Employee) पोलिसांनी बाहेर काढलं आहे. असं असलं तरी एसटी कर्मचारी आपल्या आंदोलनावर ठाम आहेत. त्यामुळं त्यांना केवळ सकाळी ५ ते संध्याकाळी ५ या वेळेत आंदोलन करता येणार आहे.

राज्यात वाढत्या कोरोना संसर्गाच्या पार्श्वभूमीवर राज्य शासनानं निर्बंध वाढवले आहेत. सध्या नव्या नियमावलीनुसार, शुक्रवार ३१ डिसेंबरच्या मध्यरात्रीपासून संध्याकाळी ५ ते पहाटे ५ वाजेपर्यंत मुंबईत जमावबंदीचं १४४ कलम लागू करण्यात आलं आहे. त्यामुळं आझाद मैदानात आंदोलनासाठी बसलेल्या एसटी कर्मचाऱ्यांना मैदान सोडण्याच्या सूचना पोलिसांनी दिल्या आहेत. आंदोलकही पोलिसांच्या या सूचनांचे पालन करत आंदोलनस्थळावरुन बाहेर पडले आहेत.

एसटी कर्मचारी सुमारे महिन्यापासून विविध मागण्यासांठी आझाद मैदानात आंदोलन करत आहेत. या मागण्यांपैकी त्यांच्या जवळपास सर्वच मागण्या राज्य शासनानं मान्य केल्या असल्या तरी कर्मचारी आता एसटीच्या विलिकरणाच्या मागणीवर ठाम आहेत.