डोंबिवली, आंबिवली येथील इराणी वस्ती गुन्हेगारांची वस्ती म्हणूनच प्रसिद्ध आहे. येथे कारवाईसाठी येणाऱ्या पोलिसांवर देखील हल्ले करण्यास येथील नागरिक कचरत नाहीत. काही दिवसांपूर्वीच कारवाईसाठी आलेल्या दहिसर पोलिसांवर हल्ला झाल्याची घटना इराणी वस्तीत घडली होती.

पोलिसांवर हल्ला करणाऱ्या आफ्रिदीच्या मागावर खडकपाडा पोलिस होते. तो सातत्याने जागा बदलत पोलिसांना चकवा देत होता. मात्र पोलिसांनी सापळा रचत अटक केली आहे. या कुख्यात इराण्यावर 30 हून अधिक गुन्हे नोंद असून 10 गुन्ह्यांमध्ये तो फरार होता.

ठाणे जिल्ह्यासह मुंबईत जबरी चोरी, वाहन चोरी, सोनसाखळी चोरी, पोलिसांवर हल्ला करणे यांसारखे गुन्हे करत धुमाकूळ घालणाऱ्या अपे दारा जाफरी उर्फ आफ्रिदी (वय 24) याला खडकपाडा पोलिसांनी सापळा रचून इराणी वस्तीतून अटक केली आहे.

कल्याणचे सहायक पोलिस आयुक्त कल्याणजी घेटे यांनी दिलेल्या माहितीनुसार काहि दिवसांपूर्वी मुंबई पोलिसांचे पथक आंबिवली येथील इराणी वस्तीत एका चोरट्याला अटक करण्यास आले होते. यावेळी आफ्रिदी याने पोलिसांना विरोध करत त्यांच्यावर दगडफेक केली होती. खडकपाडा पोलिस ठाण्यात याप्रकरणी गुन्हा दाखल करण्यात आला होता.

तेव्हापासून येथील वरिष्ठ पोलिस निरीक्षक सर्जेराव पाटील, गुन्हे शाखेचे पोलिस निरीक्षक शरद झिने यांनी एका पथकाची नेमणूक करत तपास सुरु केला. आफ्रिदी हा सातत्याने जागा बदलून पोलिसांना चकवा देत होता.

अखेर तो इराणी वस्तीतील मंगल नगर येथे रहात असल्याची माहिती पोलिस पथकाला मिळाली. पोलिसांनी तेथे सापळा रचला तो येताच त्याच्यावर झडप घालत पोलिसांनी त्याला अटक केली.

आफ्रिदी हा कुख्यात गुंड असून त्याच्यावर मुंबई, ठाणे, भिवंडी यांसह अनेक पोलिस ठाण्यात 30 च्या आसपास गुन्हे दाखल आहेत. 10 गुन्ह्यांमध्ये तो फरार आरोपी असून पोलिस त्याचा सातत्याने शोध घेत होती. त्याच्याकडून पोलिसांनी एक चोरीची मोटार सायकल व मंगळसुत्र जप्त केले आहे.