मुंबई, ता. 15 : मुंबई आणि कोकण परिसर वगळता राज्यातील इतर भागात पुढील तीन दिवस ढगाळ वातावरण राहण्याची शक्यता आहे. तर राज्यातील काही भागात पुढील 48 तासात अवकाळी पाऊस कोसळण्याचा अंदाज मुंबई प्रादेशिक हवामान विभागाने व्यक्त केला आहे. अवकाळी पावसामुळे शेतकऱ्यांना मोठा फटका बसण्याची भीती व्यक्त होत आहे.

मुंबई तसेच कोकण भागात फारसा बदल जाणवणार नाही. मात्र पुणे शहरात 16 फेब्रुवारीपासून आकाश अंशत: ढगाळ राहण्याची शक्यता आहे. थंडीचा जोरही कमी होण्याची शक्यता आहे. किमान तापमानात वाढ होऊन 14 अंश सेल्सियस वरून ते 16 अंश सेल्सियस पर्यंत वाढण्याची शक्यताही हवामान विभागाकडून वर्तवण्यात आली आहे. 

महत्त्वाची बातमी : 24 पर्यंत अटक न करण्याचे निर्देश; बिल्डर अविनाश भोसले यांना मुंबई उच्च न्यायालयाकडून तूर्तास दिलासा

सध्याच्या वातावरणात मोठ्या प्रमाणात बदल होण्याची शक्यता आहे.  18 फेब्रुवारी रोजी आकाश सामन्यत: ढगाळ राहून हलक्या स्वरुपाचा पाऊस पडू शकतो. हवामान विभागाच्या इशाऱ्यानुसार 16 ते 18 फेब्रुवारी या दोन दिवसांमध्ये राज्यातील विविध भागांमध्ये दुपारनंतर विजांच्या कडकडाटासह वादळी पाऊस होऊ शकतो असा अंदाज वर्तवला आहे.

पूर्व-विदर्भातील भंडारा, गोंदिया, गडचिरोली, चंद्रपूर, नागपूर, यवतमाळ, वर्धा आणि अमरावती जिल्ह्यातील पूर्व भागांत 16 फेब्रुवारीला वादळी पावसाचा अंदाज आहे. तर 17 तारखेला विदर्भासह, मराठवाड्यातील बऱ्याच जिल्ह्यांत वादळी पावसाचा अंदाज आहे.

महत्त्वाची बातमी : सुशांतच्या बहिणींविरोधातील याचिकेवर मुंबई उच्च न्यायालयाकडून सुनावणी; दिला महत्त्वाचा निकाल
 

मध्य महाराष्ट्रातील खान्देश, नाशिक, नगर आणि पुणे जिल्ह्यांत 18 फेब्रुवारीला वादळी पावसाचा अंदाज आहे. तर या दरम्यान काही प्रमाणात गारपिटीची शक्यता ही वर्तवण्यात आली आहे. दुसऱ्या दिवशी 19 तारखेला काही प्रमाणात आभाळी हवामान राहील. यानंतर मात्र हवामान हळूहळू पूर्वपदावर येऊन त्यात स्थिरता यायला सुरुवात होईल आणि 20 तारखेपासून राज्यातील हवामान पूर्णपणे स्थिर होईल असा अंदाज देखील व्यक्त करण्यात आला आहे.

mumbai news weather department forecasted unseasonal rain across maharashtra