डोंबिवली डोंबिवलीतील मोठागाव येथील शेहनशहाचा वाढदिवस मोठ्या धुमधडाक्यात साजरा करण्यात आला आहे. वाढदिवसानिमित्ताने गावात शेहनशहा ची मिरवणूक काढत अख्या गावानेच लाडक्या शेहनशहा ला शुभेच्छा दिल्या.

शेहनशहा हे बैलाचे नाव असून या त्याचे मालक किरण म्हात्रे हे दरवर्षी लाडक्या शेहनशहा चा वाढदिवस जंगी स्वरुपात साजरा करतात. कोरोना काळात ही त्यांनी अशाच प्रकारे वाढदिवस साजरा केल्याने त्यांच्यावर गुन्हा देखील दाखल झाला होता. शेहनशहा चा वाढदिवस अख्या ठाणे जिल्ह्यात चर्चेचा विषय असून सध्या त्याच्या वाढदिवसाचे व्हिडीओ समाज माध्यमावर व्हायरल होत आहेत.

डोंबिवली पश्चिमेतील मोठा गाव येथे राहणारे किरण म्हात्रे यांच्या बैलाचे नाव शेहनशाह आहे. किरण यांचे आपल्या बैलावर जीवापाड प्रेम असून त्याची ते मुलाप्रमाणेच काळजी घेतात. शेहनशाह चा वाढदिवस म्हटले की अख्या गावालाच पार्टीचे आमंत्रण ठरलेले असते.

दरवर्षी प्रमाणे यंदाही शेहनशाहचा वाढदिवस गावात मोठ्या जल्लोषात साजरा करण्यात आला आहे. त्याचे व्हिडीओ समाज माध्यमावर व्हायरल होत असून शेहनशाह ला ठिकठिकाणाहून वाढदिवसाच्या शुभेच्छा देण्यात येत आहेत.

वाढदिवसाच्या दिवशी किरण यांच्या कुटूंबाने शेहनशाह हा आंघोळ घालून किंमती वस्त्र घालून त्याची गावातून जंगी मिरवणूक काढली.

यावेळी महिलांनी शेहनशाह चे औक्षण केले, तर ग्रामस्थांनी त्याला शुभेच्छा दिल्या. त्यानंतर वाढदिवसानिमित्त पार्टीचे आयोजन करण्यात आले होते. यावेळी केक कापून शेहनशाह चा वाढदिवस साजरा करण्यात आला.

त्यानंतर आर्केस्ट्रावर बर्थ डे आहे शेहनशाहचा जल्लोष साऱ्या गावाचा या धून मधील गाण्यावर म्हात्रे कुटूंब, गावकरी यांनी ठेका धरत जल्लोष साजरा केला. याचा व्हिडीओ समाज माध्यमावर व्हायरल होत असून त्याची अख्या ठाणे जिल्ह्यात चर्चा सुरु आहे.

किरण हे दरवर्षी आपल्या लाडक्या शेहनशाहचा वाढदिवस जल्लोषात साजरा करत असतात. कोरोना कालखंडातही 2021 मध्ये त्यांनी शेहनशाहचा वाढदिवस धूमधडाक्यात साजरा केला होता. कोरोना नियमांचे उल्लंघन केल्याप्रकरणी त्यांच्यावर विष्णूनगर पोलिस ठाण्यात गुन्हा देखील दाखल करण्यात आला होता.