नवी मुंबई: गेले अनेक वर्षे रखडलेल्या नवी मुंबई (Navi mumbai) मेट्रोची ट्रायल रन (metro trial run)घेऊन सिडकोने कोव्हीडमुळे थांबलेल्या अर्थचक्राला पुन्हा एकदा चालना देण्याचा प्रयत्न केला. सेंट्रल पार्क खारघर ते पेइंधर अशा ८५० मीटर अंतरावर मेट्रोरेल्वेची सलग दुसऱ्यांदा यशस्वी चाचणी घेण्यात आली. महामेट्रोच्या अधिकाऱ्यांच्या उपस्थितीत ताशी ६५ प्रति किलो मीटर वेगाने चाचणी घेण्यात आली. या चाचणीनंतर डिसेंबर २०२२ पर्यंत प्रत्यक्ष मेट्रो सुरू करण्याचे प्रयत्न असल्याचे व्यवस्थापकीय संचालक डॉ. संजय मुखर्जी यांनी सांगितले. (Navi mumbai metro trial run sucessfull)

सिडकोतर्फे नवी मुंबई मेट्रो प्रकल्पाच्या बेलापूर ते पेंधर या मार्ग क्रमांक १ च्या जलद अंमलबजावणीकरिता महाराष्ट्र मेट्रो रेल कॉर्पोरेशनची (महा मेट्रो) नियुक्ती करण्यात आली आहे. त्यानुसार महा मेट्रोकडून २३ फेब्रुवारी २०२१ला प्रकल्पाच्या अंमलबजावणीकरिता २० तज्ज्ञ अभियंत्यांच्या गटाची स्थापना करण्यात आली आहे. परंतु सद्यस्थितीत मार्ग क्रमांक १ वर उभारण्यात येणाऱ्या ११ स्थानकांपैकी १ ते ६ स्थानकांच्या उभारणीचे काम काही तांत्रिक कारणांमुळे तसेच कोविड-१९ मुळे उद्भवलेल्या स्थितीमुळे अपेक्षित गतीने होत नव्हते.

या मार्गावरील उर्वरित कामे लवकरात लवकर पूर्ण करणे आणि प्रकल्पासाठी आर्थिक स्रोत निर्माण करणे, या निकषांचा विचार करून सिडकोने पर्याय शोधण्यास सुरुवात केली. यानंतर सर्वांत योग्य पर्याय म्हणून महा मेट्रोची निवड करण्यात येऊन या मार्गाचे काम महा मेट्रो यांना देण्याचा निर्णय घेण्यात आला. महा मेट्रोच्या तज्ज्ञ गटाकरिता तळोजा मेट्रो आगार येथे कामाला सुरूवात झाली आहे. मेट्रो रेल्वे सुरक्षा (सीएआरएस) यांचे आयुक्तांकडून सुरक्षाविषयक प्रमाणपत्र प्राप्त झाल्यानंतर मार्ग क्रमांक १ वरील स्थानक ७ ते ११ दरम्यान साधारणत: डिसेंबर २०२१ अखेरीस आणि स्थानक १ ते ७ दरम्यान साधारणत: डिसेंबर २०२२ अखेरीस प्रवासी वाहतुकीस सुरुवात होणार आहे.

"नवी मुंबईकरांना लवकरात लवकर मेट्रोची सफर घडवण्यासाठी आमचा आटोकाट प्रयत्न सुरू आहे. त्यादृष्टीने सिडकोतर्फे महत्वाची पाऊल उचलली जात आहेत. जलद गतीने मेट्रो धावण्यासाठी आम्ही अनुभवी अशा महामेट्रोचे सहकार्य घेत आहोत."

डॉ. संजय मुखर्जी, व्यवस्थापकीय संचालक, सिडको.