ठाणे : कोरोनाचा वाढता प्रादुर्भाव लक्षात घेऊन ठाणे जिल्हा सामान्य रुग्णालयाचे 'कोव्हिड-19' रुग्णालयात रुपांतर करण्यात आले आहे. येथील रुग्णांवर उपचार करण्यासाठी भूलतज्ज्ञांची आवश्यकता असते. मात्र, नियुक्त केलेले चार पैकी तीन भूलतज्ज्ञ सतत गैरहजर राहत असल्याने त्यांना कामावर रुजू होण्याबाबत कळवण्यात आले होते. तरीही ते हजर होत नसल्याने जिल्हा सामान्य रुग्णालय प्रशासनाने त्यांच्यावर कारवाईचा बडगा उगारण्याचा निर्णय घेत परवाना रद्द करण्याबाबतचा प्रस्तव आरोग्य विभागाकडे पाठवला आहे. 

वाचा सविस्तर : कोरोनाबाधितांची घुसमट थांबणार! वाशीच्या प्रदर्शन केंद्रातील 500 खाटांचे ऑक्सिजन सुरू

ठाणे जिल्हा सामान्य रुग्णालयात ठाणे व पालघर जिल्ह्यातील ग्रामीण भागातून गोरगरीब रुग्ण मोठ्या संख्येने उपचारासाठी येत असतात. रुग्णांवर उपचार करण्याबरोबरच त्यांच्यावर शस्त्रक्रिया देखील करण्यात येतात. त्यामुळे जिल्हा रुग्णालयात चार भूलतज्ज्ञांची नेमणूक करण्यात आली आहे.

एप्रिल महिन्यापासून जिल्हा सामान्य रुग्णालयाचे 'कोव्हिड-19' रुग्णालयात रुपांतर करण्यात आले. त्यामुळे सद्यस्थितीत या रुग्णालयात केवळ कोरोनाबाधित रुग्णांवरच उपचार केले जात आहेत. यामध्ये कोरोनाबाधित गर्भवती महिलांचा देखील समावेश असतो. त्यामुळे या रुग्णालयात दोन स्त्रीरोग तज्ज्ञांसह भूलतज्ज्ञांची नेमणूक करण्यात आली आहे. 

दरम्यान, जिल्हा रुग्णालयात कोरोना पॉझिटिव्ह गर्भवतींची संख्या वाढत असल्याने भूलतज्ज्ञांची आवश्यकता भासू लागली. मात्र, तीन भूलतज्ज्ञ वारंवार गैरहजर राहत असल्यामुळे रुग्णांवर उपचार, शस्त्रक्रिया करतान्या मोठ्या अडचणींचा सामना रुग्णालय प्रशासनाला करावा लागत होता.

यशस्वी वैमानिक होऊन बापाचे कर्ज फेडणाऱ्या 'या' महिलेच यशोगाथा नक्की वाचा

या तीन भूलतज्ज्ञांना वारंवार कामावर रुजू होण्याबाबत रुग्णालयाकडून वारंवार कळविण्यात येत होते. तरीही कामावर रुजू होत नसल्याचे दिसून आल्यानंतर जिल्हा सामान्य रुग्णालय प्रशासनाने त्यांच्यावर कारवाईचा निर्णय घेतला आहे. 

रुग्णालयात आवश्यकता असतानाही तिन्ही भूलतज्ज्ञ गैरहजर राहत असल्याने त्यांचा परवाना रद्द करण्याबाबतचा प्रस्तवा आरोग्य विभागाकडे पाठविण्यात आला आहे. 
- डॉ. कैलास पवार,
जिल्हा शल्यचिकित्सक