मुंबई : महाराष्ट्राचे वनमंत्री आणि शिवसेनेचे नेते संजय राठोड यांना अखेर पूजा चव्हाण मृत्यू प्रकरण तूर्तास चांगलंच भोवलेलं पाहायला मिळतंय. वनमंत्री संजय राठोड यांनी अखेर आपल्या मंत्रिपदाचा राजीनामा दिला आहे. आज संजय राठोड यांनी मुख्यमंत्र्यांच्या वर्षा बंगल्यावर जाऊन उद्धव ठाकरे यांची भेट घेतली आणि संजय राठोड यांनी आपल्या मंत्रिपदाचा राजीनामा दिला आहे. उद्यापासून महाराष्ट्र राज्याचं अर्थसंकल्पीय अधिवेशन सुरु होणार आहे. अशात विरोधीपक्षाकडून संजय राठोड यांचा राजीनामा घेण्याची मागणी जोर धरताना पाहायला मिळाली. सोबतच महाविकास आघाडी सरकारमधील राष्ट्रवादी काँग्रेसकडूननही सरकारवर संजय राठोड यांच्या राजीनाम्यासाठी दबाव असल्याचं राजकीय विश्लेषक सांगतायत.

महत्त्वाची बातमी : 17 हून अधिक यूट्यूब चॅनल आणि फेसबुक पेजेस, तब्बल 300 व्हिडीओ अपलोड करून कमवले 2 कोटी

आपण राजीनामा दिला आहे का? मुख्यमंत्र्यांनी तो स्वीकारला आहे का ? 

मी माझा राजीनामा मुख्यमंत्र्यांकडे दिलेला आहे. गेल्या अनेक दिवसांपासून आमच्या बंजारा समाजाची तरुणी पूजा चव्हाण हीचा दुर्दैवी मृत्यू झाला होता. त्यांच्या मृत्यूवरून विरोधी पक्षाकडून प्रसारमाध्यमे आणि समाज माध्यमांच्या वापर करून घाणेरडं राजकारण करण्याचा प्रयत्न केला. मीडियाच्या माध्यमातून आमच्या समाजाची आणि माझी वैयक्तिक बदनामी देखील करण्याचा प्रयत्न करण्यात आला. मला राजकीय जीवनातून उठवण्याचा प्रकार याठिकाणी करताना पाहायला मिळाला. गेली ३० वर्षे मी केलेलं सामाजिक आणि राजकीय काम उध्वस्त करण्याचं काम झालेलं आहे. या सर्व प्रकरणाची निष्पक्ष चौकशी व्हावी, याचा तपास व्हावा ही माझी मागणी आहे. सत्य बाहेर यावं आणि खरं सत्य बाहेर यावं ही माझी भूमिका आहे. त्याबाबत मी मुख्यमंत्र्यांशी बोललो आणि माझा राजीनामा दिलेला आहे. 

महत्त्वाची बातमी : पूजा चव्हाण मृत्यूप्रकरणी मंत्री संजय राठोड यांचा राजीनामा

मी माझा राजीनामा मुख्यमंत्र्यांना देऊन आलेलो आहे. माझ्यासोबत आमचे संसदीय कार्यमंत्री अनिल परब तसेच शिवसेना पक्ष सचिव अनिल देसाई हे देखील होते. हे सुद्धा साक्षिदार आहेत आणि मी मुख्यमंत्र्यांना राजीनामा दिलेला आहे. तूर्तास मी आमदारकीचा राजीनामा दिलेला नाही, मी केवळ मंत्रिपदाचा  राजीनामा दिलेला आहे असं संजय राठोड म्हणालेत.

माझी कायम पोलिस तपासातून सत्य बाहेर येऊ द्या ही भूमिका होती. मात्र ज्या पद्धतीने राजकारण केलं, अधिवेशन चालू देणार नाही असं विरोधकांकडून बोललं गेलं, हे बाबासाहेबांच्या घटनेच्या विरोधात आहे, हे लोकशाहीच्या विरोधात आहे. यामुळे माझ्यावर आणि समाजावर जो परिणाम झाला म्हणून मी राजीनामा दिलेला आहे. तपास निष्पक्ष पद्धतीने झाला पाहिजे हीच माझी भूमिका आहे, सत्य बाहेर आलं पाहिजे ही माझी भूमिका, असं संजय राठोड म्हणालेत. 

sanjay rathores first reaction after giving resignation of his ministry to CM uddhav thackeray