नवी मुंबई : घणसोलीतील काही भागात गाड्यांच्या काचा फोडण्याचे सत्र सुरूच आहे. शनिवारी रात्री सात कारच्या काचा फोडण्यात आल्याचे आढळले आहे. अज्ञात व्यक्तीकडून या काचा फोडण्यात येत आहेत; मात्र, वाहनमालकांना याचा नाहक आर्थिक भुर्दंड सहन करावा लागत आहे. त्यामुळे ते हतबल झाले असून, त्या व्यक्तींविरोधात कारवाई करण्यात यावी, यासाठी परिसरातील वाहनमालकांनी एकत्र येऊन रबाळे पोलिस ठाण्यात तक्रार दाखल केली आहे.
घणसोली येथील डी-मार्टलगत असणाऱ्या रिद्धीसिद्धी इमारतीसमोर व साई सदानंदनगर परिसरात कारचालक आपली वाहने उभी करतात; परंतु रात्री 3 ते 5 वाजण्याच्या दरम्यान अज्ञात व्यक्ती येते. मोठा दगड काचेवर आपटते. हा प्रकार गेल्या महिन्यापासून नियमित सुरू आहे. यामुळे आजतागायत 70च्या आसपास कारच्या काचा फोडल्या असल्याचे कारमालक नितीन बनसोडे यांनी सांगितले.
जी व्यक्ती कारची काच फोडते, ती कारमध्ये असणारे कोणतेही किमती साहित्य चोरी करत नाही; परंतु वाहनांची काच फोडल्यामुळे कार मालकाला दोन तीन हजार रुपयांचा नाहक खर्च करावा लागतो. आधीच व्यवसायात मारामारी असताना हा नाहक भुर्दंड वाहनमालकाला पडत असल्याने मालक भयभीत झाले असल्याचे वाहनचालकांचे म्हणणे आहे. त्यामुळे काचा फोडणाऱ्या व्यक्तीला पाळत ठेवून अटक करावी, अशी मागणी सामाजिक कार्यकर्ते करण म्हात्रे यांनी केली आहे. याबाबत रबाळे पोलिस ठाण्याचे वरिष्ठ पोलिस निरीक्षक योगेश गावडे यांना विचारले असता, काचा फोडणाऱ्या अज्ञात व्यक्तीला लवकरच पकडले जाईल, असे त्यांनी सांगितले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.