मुंबई: कोरोना महामारीच्या पार्श्वभूमीवर ऑक्सिजन वाहतुकीसाठी राज्य शासनाने नायट्रोजन, आयगॉन वायूची वाहतुक करणाऱ्या टँकरचे रूपांतरण करण्याच्या सूचना दिल्या आहे. त्याप्रमाणे टँकरचे रूपांतरण केले खरे मात्र, आता त्यांना आश्वासन देण्यात आलेला मोबदलाच दिला जात नसल्याचे उघड झाले आहे. राज्य सरकारने रूपांतरित टँकर्सला दिल्या जाणाऱ्या मोबदल्या संदर्भात निर्णयच घेतला नसल्याने ऑक्सिजन वाहतुकीची राज्यात ढकलगाडी सुरू असल्याचे दिसून येत आहे.

गेल्या वर्षी कोरोनाची पहिली लाट आणि यावर्षी दुसऱ्या लाटेमुळे राज्यात ऑक्सिजन, औषध आणि बेड, व्हेंटिलेटरचा तुटवडा निर्माण झाला होता. त्यामध्येच आता तिसरी लाट येण्याची शक्यता तज्ज्ञांकडून व्यक्त केली जात असताना, तिसऱ्या लाटेशी मुकाबला करण्यासाठी ऑक्सिजन आणि कोविड रिलीफ औषधें आणि साहित्य मोठ्या प्रमाणात असणे आवश्यक आहे. मात्र, राज्य सरकारकडून ऑक्सिजन वाहून नेणाऱ्या टँकर्स कंपन्यांना त्याचा मोबदला देत नसल्याने अधिकाधिक टँकर्स राज्यातील ऑक्सिजन वाहतुकीचे काम सोडून नफखोरीसाठी दुसऱ्या राज्यात जात असल्याचे दिसून येत आहे.

गेल्या अनेक दिवसांपासून टँकर कंपन्यांच्या मोबदल्याची मागणी रखडलीच असल्याने त्याचा परिणाम भविष्यात ऑक्सिजन वाहतुकीवर पडण्याची शक्यता आहे. राज्य सरकारने रूपांतरित टँकर्सला त्यांना दिलेल्या आश्वासनाप्रमाणे मोबदला देणे आवश्यक आहे. त्यावर धोरणात्मक निर्णय लवकर घेतला नाहीतर सध्या ऑक्सीजन वाहतूक करणारे टँकर्स सुद्धा पळून जाण्याची शक्यता असल्याचे राज्य शासनातील एका अधिकाऱ्यांनी नाव न लिहिण्याच्या अटीवर सकाळशी बोलतांना सांगितले आहे.

राज्य सरकारने अद्याप मोबदला देण्यावर कोणताही निर्णय घेतला नाही त्यामुळे वेळोवेळी या रूपांतरित केलेल्या टँकर्स कंपन्यांना विनंती करावी लागत आहे. अनेक कंपन्यांचे टँकर्स बंद झाले असून, सध्या कार्यरत असलेले टँकर्स सुद्धा पळून जाऊ शकतात,त्यामुळे कंपन्यांना कबूल केलेला मोबदला देणे आवश्यक असल्याचे राज्य परिवहन विभागातील वरिष्ठ अधिकाऱ्यांनी सांगितले आहे.