ठाणे : ठाण्यात एकट्या-दुकट्या ज्येष्ठ नागरिकांना गंडा घालण्यासह ज्येष्ठ महिलांच्या सोनसाखळी चोरीच्या घटना वाढल्या आहेत. याला आळा घालण्यासाठी ठाणे पोलिस "ज्येष्ठ दक्ष' बनले आहेत. त्यानुसार ज्येष्ठ नागरिकांच्या समस्या जाणून घेत त्यांच्याशी संवाद साधत त्यांना अपप्रवृत्तीपासून सावध राहून काळजी घेण्याचे आवाहन आणि जनजागृती पोलिसांमार्फत करण्यात येत आहे. नौपाडा पोलिस ठाण्याच्या अधिकाऱ्यांनी नुकताच कचराळी तलाव परिसरात जमलेल्या ज्येष्ठ नागरिकांशी संवाद साधत जनजागृती मोहीम राबविली.
ठाणे पोलिस आयुक्तालय क्षेत्रात मागील काही काळापासून ज्येष्ठ नागरिकांना लुबाडण्याचे, तसेच वृद्ध महिलांच्या सोनसाखळी हिसकावण्याचे प्रकार वाढले आहेत. शिवाय भामटे बतावणी करून घरात शिरून मुद्देमाल लांबवत असल्याने पोलिसांची डोकेदुखी वाढली होती. पोलिसांची गस्त वाढवूनही गुन्हे घडत असल्याने पोलिसांनीच "ज्येष्ठ दक्ष' बनण्याचे ठरवले. त्यानुसार ठाणे पालिका मुख्यालयासमोर असलेल्या कचराळी तलाव परिसरात दररोज फेरफटका मारण्यासाठी येणाऱ्या ज्येष्ठ नागरिकांशी संवाद साधून त्यांना मार्गदर्शन करण्याचा उपक्रम पोलिसांनी सुरू केला आहे.
ज्येष्ठ नागरिकांनी आपले सोन्याचे दागिने कपाटात किंवा कपड्यामध्ये न ठेवता सुरक्षित अशा लॉकरमध्ये ठेवावेत. कुणाही अनोळखी व्यक्तीला घरात प्रवेश देऊ नये. कुरिअर, केबल किंवा बॅंकेची तत्सम कामांचा बहाणा करून येणाऱ्यांची खात्री पटल्याशिवाय विश्वास ठेऊ नये, अशा प्रकारे ज्येष्ठ नागरिकांशी संवाद साधून, पोलिस तुमच्या रक्षणासाठी असून तुम्ही मदत मागितल्यास ती तत्काळ उपलब्ध करून देण्यात येईल, असा पोलिसांच्या प्रती विश्वास निर्माण करण्याचे काम करण्यात येत आहे.
ज्येष्ठ नागरिकांना एकटे पाहून त्यांना फसविण्याचे प्रकार ठाण्यात वाढले होते. गुन्हेगारांवर वचक बसावा, यासाठी पोलिस सतर्क आहेतच; किंबहुना ज्येष्ठांचेच प्रबोधन केल्याने गुन्ह्यांचे प्रमाण घटले आहे. याबरोबरच एकट्या राहणाऱ्या ज्येष्ठ नागरिकांना काही वैद्यकीय मदत किंवा औषधे यांची गरज भासल्यास त्यांनी पोलिसांनी दिलेल्या हेल्पलाईन आणि दूरध्वनीवर संपर्क साधावा. पोलिस त्यांची गरज आणि आवश्यकता पूर्ण करतील, अशी व्यवस्था केली आहे.
- अनिल मांगले
वरिष्ठ पोलिस निरीक्षक,
नौपाडा पोलिस ठाणे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.