Mumbai News: केंद्रीय माध्यमिक शिक्षण मंडळाच्या (सीबीएसई) नावाखाली शाळांमध्ये डमी विद्यार्थी दाखवणे, वाटेल तसा आर्थिक कारभार, कोणत्याही नोंदी नसल्याचा ठपका ठेवत देशातील २० शाळांची मान्यता काढली आहे. या शाळांमध्ये पुणे, ठाण्यातील एका शाळेचा समावेश आहे.

देशातील मान्यता काढलेल्या २० शाळांमध्ये राज्यातील दोन शाळांचा समावेश आहे. तर देशातील सर्वाधिक शाळा दिल्लीतील असून त्याखालोखाल उत्तर प्रदेशातील आणि छत्तीसगड-राजस्थानमधील प्रत्येकी दोन शाळा तर उर्वरित केरळ, जम्मू काश्मीर, उत्तराखंड, मध्य प्रदेश, आसाम आदी राज्यातील प्रत्येकी एका शाळेचा समावेश आहे.(thane news )

राज्यातील दोन शाळांपैकी ठाण्यातील राहुल इंटरनॅशनल स्कूल आणि पुण्यातील पायोनिर पब्लिक स्कूल या दोन शाळांचा यात समावेश आहे. या शाळांमध्ये विविध प्रकारचे गैरप्रकार सुरू असल्याची बाब सीबीएसईला तपासणीत आढळून आली होती.

तसेच देशात मोठ्या प्रमाणात सीबीएसईच्या शाळांची संख्या वाढत असून अनेक शाळा एकदा संलग्नता आणि मान्यता घेतल्यानंतर मंडळाकडे कोणताही संबंध ठेवत नसल्याने शाळा मंडळाने दिलेल्या निकषांचे, परीक्षा आणि त्यासाठीच्या नियमांचे पालन होत नसल्याचे समोर आले होते.(CBSC Crime News )

यामुळे कारवाईचा बडगा

या शाळांमध्ये परीक्षेच्या काळात डमी विद्यार्थी बसवून परीक्षा देत असल्याची बाब निदर्शनाला आली होती. तसेच अपात्र ठरवण्यात आलेले विद्यार्थीही यात होते. यामुळे परीक्षा आणि इतर अनेक विषयांमध्ये या शाळांमध्ये मोठ्या प्रमाणात गैरकारभार सुरू असल्याचे मंडळाच्या निदर्शनाला आले होते.

शाळांमधील प्रवेश, संबंधित विद्यार्थी, परीक्षेला बसलेले विद्यार्थी यांच्याही नीट नोंदी ठेवण्यात आल्या नव्हत्या. त्यामुळे देशातील २० शाळांसोबत दिल्ली, पंजाब आणि आसाम येथील प्रत्येकी एका शाळेचा ग्रेडही कमी करून त्यांना अवनत करण्यात आले आहे.

इंग्रजी शाळांच्या नावाखाली राज्यातील अनेक मोठ्या शाळांमध्ये आर्थिक गैरप्रकार सुरू आहेत. शुल्क, डोनेशन आकारण्यावर कोणाचाही अंकुश नव्हता. तसेच परीक्षेला डमी विद्यार्थी बसवून आपले निकाल वाढवत असल्याने त्यांची मान्यता काढण्यात आली आहे.
- प्रवीण यादव, अध्यक्ष, फुले-शाहू-आंबेडकर पालक-विद्यार्थी संघटना