भिवंडी, ता. २९ (बातमीदार) : भिवंडी शहा पोलिओ मुक्त करण्यासाठी महापालिकेने पुढाकार घेतला असून पल्स पोलिओ मोहीम सुरू करण्यात आली आहे. नागरिकांनी या लसीकरण केंद्रावरील व त्यानंतर घरोघर होणाऱ्या लसीकरण मोहिमेत सहभागी होऊन आपल्या मुलांचे लसीकरण करून घ्यावे, तसेच या राष्ट्रीय कार्यात सहभागी होऊन भिवंडी पोलिओ मुक्त करण्यास हातभार लावावा, असे आवाहन अतिरिक्त आयुक्त ओमप्रकाश दिवटे यांनी पल्स पोलिओ केंद्राचे उद्‌घाटन प्रसंगी केले.
जागतिक आरोग्य संघटनांच्या सूचनेप्रमाणे भारतातून पल्स पोलिओसारखा गंभीर आजार हद्दपार करण्यासाठी केंद्र आणि राज्य सरकारच्या धोरणानुसार विविध स्थानिक संस्थांच्या स्तरांवर लसीकरणाचे कार्यक्रम घेतले जात आहे. पोलिओ मुक्त भारत अभियानांतर्गत पल्स पोलिओ लसीकरण मोहीम प्रत्येक राज्यामध्ये राबविली जात आहे. त्याच अनुषंगाने भिवंडी पोलिओ मुक्त करण्यासाठी भिवंडी शहरामध्ये ४१९ केंद्रांवर आणि तीन दिवस घरोघरी जाऊन महापालिकेमार्फत ० ते ५ वर्षे या वयोगटातील बालकांचे पल्स पोलिओ लसीकरण केले जाणार आहे. शहरातील इंदिरा गांधी स्मृती रुग्णालय या ठिकाणी पोलिओ लसीकरण मोहिमेचे उद्‌घाटन अतिरिक्त आयुक्त ओमप्रकाश दिवटे यांनी केले. यावेळी आरोग्य विभागाच्या वैद्यकीय अधिकारी डॉ. बुशरा सय्यद, डॉ. वर्षा बारोट, आरोग्य विभागाचे कर्मचारी, फिल्ड ऑफिसर, नागरिक व लाभार्थी मुले आदी उपस्थित होते.

मोहिमेत समन्वय राखा
लसीकरण मोहिमेसाठी नियुक्त मनपा कर्मचारी, आशा वर्कर, विविध सामाजिक संस्था, एनजीओ, डॉक्टर्स, आरोग्य कर्मचारी यांनी केंद्रांवरील व घरोघरी सुरु होणाऱ्या पल्स पोलिओ लसीकरण मोहिमेमध्ये विशेष कामगिरी करून योग्य तो समन्वय राखून काम करावे आणि आपले लसीकरणाचे टार्गेट यशस्वीपणे पूर्ण करावे, असेही अतिरिक्त आयुक्तांनी सांगितले.