Mumbai News: खारघर पोलिसांनी शुक्रवारी (ता. १९) रात्री केलेल्या कोम्बिंग ऑपरेशनदरम्यान खारघर परिसरात बेकायदा वास्तव्यास असलेल्या १२ परदेशी नागरिकांची धरपकड केली.

यात १० आफ्रिकन महिला तसेच २ बांगलादेशी नागरिकांचा समावेश आहे. हे सर्व परदेशी नागरिक काही वर्षांपासून नवी मुंबईत बेकायदा वास्तव्यास असल्याचे त्यांच्या चौकशीत आढळून आले आहे. पोलिसांनी सर्वांना अटक करून त्यांना त्यांच्या मूळ देशात पाठविण्याची कार्यवाही सुरू केली आहे.

कोम्बिंग ऑपरेशनदरम्यान खारघर सेक्टर-२७ मधील रांजणपाडा भागातील मेट्रो रेसीडेन्सी या इमारतीत काही नायजेरियन नागरिक बेकायदा राहत असल्याची माहिती पोलिसांना मिळाली होती. त्यानुसार पोलिसांनी रात्री सव्वादहा वाजण्याच्या सुमारास छापा मारला असता, फ्लॅटमध्ये १० आफ्रिकन महिला आढळून आल्या.

त्यांच्याकडे भारतातील वास्तव्याबाबतचे कागदपत्रे, तसेच पासपोर्ट, व्हिजा नसल्याचे आढळून आले. तसेच त्यांनी युगांडा देशाचे नागरिक असल्याची कबुली दिली. तसेच सेक्टर-१८ मध्ये बालाजी स्वीटसमोर काजल मुख्तार शेख (३६) व नूर इस्लाम लतीफ शेख (४२) हे दोघे संशयास्पदरीत्या आढळून आले.

पोलिसांनी त्यांच्याकडे चौकशी केली असता, त्यांच्याकडे भारतातील वास्तव्याबाबतचे तसेच पासपोर्ट व व्हिसा आदी कागदपत्रे नसल्याचे आढळून आले. त्यांनी बांगलादेशी नागरिक असल्याची कबुली दिली. त्यानुसार पोलिसांनी १२ जणांना अटक केली आहे.