मुंबई : वांद्रे-कुर्ला संकुलाच्या (बीकेसी) धर्तीवर आता वडाळा येथे मिनी बीकेसी उभे राहणार आहे. सध्या अस्तित्वात असलेल्या वडाळा ट्रक टर्मिनलची जागा आणि लगतच्या भूखंडावर एमएमआरडीए बीकेसीप्रमाणे नियोजनबद्धरित्या व्यवसाय केंद्र (कॉर्पोरेट हब) विकसित करणार आहे. त्यानुसार येथे वेगवेगळ्या कंपन्यांची कार्यालये यावीत, एमएमआरडीएला निधी उपलब्ध व्हावा म्हणून येथील भूखंडाचा लिलाव केला जाणार आहे. त्याची सुरुवात पुढील दोन-तीन महिन्यांत होणार आहे.

देशाच्या विकासाला चालना देण्यासाठी राज्य सरकारने आपली अर्थव्यवस्था एक ट्रिलियन डॉलरपर्यंत वाढवण्याचे उद्दिष्ट ठेवले आहे. त्यामध्ये एमएमआरडीएकडून महत्त्वाची भूमिका बजावली जात असून, वेगवान वाहतुकीसाठी पायाभूत सुविधा उभारल्या जात आहेत. दरम्यान, सध्या वांद्रे-कुर्ला संकुलात काॅर्पोरेट कार्यालये झाली आहेत.

मध्यवर्ती केंद्र ठरणार

सध्या वडाळा ट्रक टर्मिनल येथे जाताना मोठी अडचण होते, मात्र भविष्यात वाहतुकीच्या दृष्टीने मध्यवर्ती केंद्र ठरणार आहे.

वांद्रे -कुर्ला संकुलाचे एकूण क्षेत्रफळ ३७० हेक्टर

वडाळा व्यवसाय केंद्राचे एकूण क्षेत्रफळ १५६ हेक्टर

• पर्यायी जागेमुळे बिकेसीतील गर्दी कमी होणार व्यवसायिक जागा उपलब्ध

• एमएमआरडीएकडून वडाळा-कासारवडवली दरम्यान उभारली जाणारी मेट्रो-४

• अंधेरी-मंडाळे मेट्रो -२ बी

• सध्या मोनोरेलची सुविधा उपलब्ध

• अटल सेतूवरून सहजपणे पोहोचणे शक्य

• वडाळ्यापासून नजीकच इस्टर्न फ्री वे

• हार्बर मार्गिका असल्याने कनेक्टिव्हिटीच्या दृष्टीने वडाळा कार्पोरेट हब मध्यवर्ती ठिकाण होणार आहे.

दीर्घ मुदतीसाठी भाडेकरार

एमएमआरडीए वडाळा ट्रक टर्मिनलसह लगतच्या १५६ हेक्टर जागेवर कॉर्पोरेट हब उभारणार आहे. येथील जागा वेगवेगळ्या कंपन्यांना भाडेकरारावर उपलब्ध करून दिल्या जाणार असून, त्याबाबतचे नियोजन सुरू असल्याचे आयुक्त डॉ. संजय मुखर्जी यांनी सांगितले.

स्थलांतर?

वडाळा येथे ट्रक टर्मिनल आहे. त्या जागेवर मध्यवर्ती विकास केंद्र बनवले जाणार आहे. त्यामुळे सदरचे ट्रक टर्मिनल इतरत्र स्थलांतर करण्याचे नियोजन आहे. त्याबाबत संबंधितांशी चर्चा करून मार्ग काढला जाणार आहे.